Vunzgeq naeuz: Miz lae doxdab benz ndaej sang, miz giuz vangdah bae gyae’gvangq.

Baezneix haj nyied, gou ndaej bae Bingzgoj Si hagsib, ndaej haeuj Bingzgoj Duzsuhgvanj bae hwnjdangz, raen aen duzsuhgvanj sanghung gvangqlangh neix, ndawsim cibfaen doeksaet youh gikdoengh.

Ngoenzhaenx haeujhaemh, gwn caeuz le, gou caeuq geij boux caemhdoih bae Bingzgoj Duzsuhgvanj. Baez daengz bakdou duzsuhgvanj, ndawsim couh deng saenqdoengh lo, aen laeuz sang haenx youh hung youh gvangq, daj bakdou yawj coh baihswix baihgvaz cungjdwg raezrwdrwd.

Cingq yawj ngawh seiz, couh raen lauxsae byaij okdou daeuj ciep dou. Yamqhaeuj bakdou bae, caiq gvaq aen gvan ancienz genjcaz, cijndaej haeuj daengz ndaw bae lo. Ndaw duzsuhgvanj hai gunghdiuz, liengzlili caemrwgrwg, song boux doih gangjvah sing loq sang di, couh miz bouxvunz guenjleix gvaqdaeuj daengqnaeuz:“Geij boux lauxsae, gangjvah mbouj ndaej baenzneix sing sang bw, vunzlai yaek yawjsaw bw!” Dou geij boux dingqnyi le, doq nyuphoz mbaetsing lo. Seizhaenx, lauxsae couh gvaqdaeuj daengqvah:“Bet diemj cung haidangz, lijmiz aen cungdaeuz dem, daihgya menhmenh byaij menhmenh yawj.” Dou geij boux couh sanqbae cazyawj lo.

Gou youq caengz daih’it menh yawj menh byaij, raen baenz baiz baenz baiz gaqsaw baij ndaej caezcaez cingjcingj, moix aen gaq miz geij caengz, caengzcaengz cungj baij rim saw. Youq guengh gaqsaw, lij an aen dieg lumj aen gyausiz nei hawj gyoengqvunz yawjsaw. Gij vunz yawjsaw haenx, miz bouxgeq, miz bouxnomj, lijmiz daxboh rox daxmeh daiq lwgnyez daeuj yawjsaw. Moix aen dieg yawjsaw cungj caemrikrik, yienznaeuz gij vunz yawjsaw mbouj noix, hoeng gak boux gak haeujsim bae guh, mizmbangj yawjsaw, mizmbangj guh cozyez, mizmbangj cazra swhliu, miz maz doxcam cungj sing daemq gangj menh. Gou yawjraen gij cingzgingj neix, ndawsim gag danqhaenh mbouj daengx, cix ngeix daengz coenzvah naeuz: Gaenx hag cix son gvai, yawj lai sim cix rongh; sawmaeg lumj daeng ndongq, ciuq loh bongh bae gyae……

Ngamq yienghneix siengj, couh dingqnyi bouxdoih naeuz hwnj caengz daihngeih bae. Hwnj daengz caengz daihngeih, caemh raen gizgiz caemrikrik lumj mbouj miz vunz nei, baez byaij gvaq guengh gaqsaw bae, cix raen gij vunz yawjsaw haenx onjonj dinghdingh, gak boux gak yawj, mbouj miz saek boux youqndwi roxnaeuz guhcaemz, dauq dwg dou geij boux byaij bae byaij dauq, lumj bouxvangh neix, yienznaeuz gij vunz haeujsim yawjsaw haenx mbouj yawj daeuj coh, gou lij gag raen yakfaz, cix vaiqdangq yaeng’yaeng byaij okdaeuj, daengz henz baklae haenx caeuq boux guenjsaw laeglemx doxcam. Boux- guenj naeuz:“Bingzgoj Si aen duzsuhgvanj moq neix, bi’gvaq cibngeih nyied buen gvaqdaeuj le couh hai gvanj lo, seizneix miz 27 fanh lai bonj saw, miz 750 aen diegnaengh hawj vunz yawjsaw, caenhrengz caux aen dieg ndei cwxcaih hawj gyoengqvunz yawjsaw.” Gou daengj mehfwngz bae coh de naeuz:“Dahnuengx, sou sinhoj lo! Caen hozhaenz sou, hwnjban caemh ndaej naengh youq guengh saw.” De ngaekngaek gyaeuj riu naeuz:“Dwg la, dwg la.”

Ngoenz daihngeih haetromh caet diemj lai, dou couh raen gyoengq hagseng loq hung haenx youq bakdou duzsuhgvanj baizdui caj haidou yawjsaw, gij ndit haetromh ciuq gwnz ndang gyoengqde, lumj roemj caengz mokgim nei ndongqyamyam, hawj vunz simdoengh, gou cix roxnyinh bang hagseng haenx lumj va lumj mak youq ndaw suen majhung hwnghwd, geijlai vuenyungz, geijlai hoenghhwd miz muengh ha. Gyoengqdoih gou cungj sim haenz danqhaenh mbouj dingz:“Bang hagseng neix baenzlai roxyiuj gaenx hag, caen hawj vunz simhai.” “Diegneix caen dwg sawmaeg homfwdfwd ha!”

Seizneix, ndwenngoenz onjan, gyoengq bouxdaeuz naengh sang haenx, caen yawj ndaej gyae, siengj bae gonq, laebcaux aen duzsuhgvanj hunggvangq neix, ciuyinx vunzlai daeuj yawjsaw, cauxbaenz aen dieg ndei vunz haengj doegsaw, saw homfwdfwd, fuk ciuhlwg ciuhlan, caen hawj vunz gamjdoengh ha!

Boux vwnzyozgyah Sihhan Liuz Yang naeuz:“Saw lumj yw, rox doeg cix ndaej yw bamz.”

Saw, lumj ga lae, bad hawj vunz benz hwnj dieg sang yawj ndaej gyae raen ndaej gvangq; saw, lumj diuzgiuz bad cohlaeng dap baenaj, hawj vunz rox gij gojsaeh ciuhgonq, rox gij lizsij gak ciuzdaih ciuhgeq, hawj vunz muenghsiengj gyaeundei baenaj caeuq bienqvaq…… Doegsaw, hawj vunz rox leix, hawj vunz baenaj. Geij ngoenz haenx, yawjraen gyoengqvunz youq ndaw duzsuhgvanj haeujsim yawjsaw hagsib, gou nyaenx mbouj ndaej ngeix lai ngeix gvangq, ngeix daengz seiz lij iq, gwn mbouj imq daenj mbouj raeuj, bohmeh lij caenhrengz hawj dou geij beixnuengx doegsaw, geijlai sinhoj youh deng vunz riu lwnh.

Bide seizcou, gou cibcaet bi, daxmeh bingh naek, daxboh mbouj youq ranz, bang nuengx youh lij iq, mbouj miz vunz guhhong, gou couh mbouj bae doegsaw lo. Mwhde, reihnaz ngamq faen daengz ranz, gak ranz gak dajndaem, gou gungzliklik gag cae reih rauq naz, doek gyaj sou duh, saemxsaemx saxsax guh mbouj baenz mbouj bwh, caemh mbouj yiem hoj saek coenz.

Bi daihngeih seizcou, daxboh cix bae yienhsingz ra hagdangz hawj gou caiq doegsaw. Haihag geij ngoenz le, boux banhcujyin ra gou gangjgoj:“Dou yousim mwngz goekdaej mbouj maenh, youh youq ranz baenz bi, muengh mwngz haeujsim bae hagsib, menhmenh gyaepriengz vunzlai.” Banhcujyin dawz gaiq yaekseiz yienh hawj gou naeuz:“Yaekseiz gyausiz hawj mwngz dawz, mwngz guh boux hai dou caj dou. Mwngz mbouj yungh niemh daxmeh caeuq bang nuengx, mbouj siengj gij hong reihnaz, daxboh dap lae bad giuz hawj mwngz daeuj hagdangz neix, couh muengh mwngz roengzrengz bae doegsaw, hawj mwngz ciuhvunz miz lai diuzloh bae bin sang yawj gvangq byaij gyae, mwngz rox lwi?”

Dwg ha, miz bohmeh dap lae, miz lauxsae bad giuz, raeuz cij ndaej benz sang bae gyae, ndaej haisim gvaq ndei raen lai raen daih.

Bouxdoih gangj ndaej deng, daeuj daengz dieg Bingzgoj, roxnyinh gizgiz miz heiqrang sawmaeg, hawj vunz ndawsim ronghsagsag, gou cix gag haenh gag damz:

Hah daengz gogo fat,

Ngux loeg ndat lumj feiz;

Hagseng mbouj nguh seiz,

Doxceng bae hagdoeg.

Bohmeh caez dap lae,

Lauxsae bad giuz gvangq;

Roen hagsib raezrangh,

Lwgnyez angq daeuj ra.