Meuz ha, mwngz mbouj rox, vunzmbanj gyoengqraeuz ngaeuq vunz gyo mbwn, cunhcangj lij youq dangqnaj fwx(bouxwnq) gvih roengzdaeuj gvaq, ndaw yienh lumjnaeuz cungj mbouj dawzhaeujrwz nauq, lumjnaeuz cungj yawj mbouj raen nauq, mbouj ndwetndw mbouj leixlangh nauq, gijmaz cungj mbouj guh nauq. Dwgrengz ha, dwgrengz lai lo. Meuz ha, gou yienghneix naeuz cix lumj byaij doulaeng nei lo, hoeng mwngz caemh dwg vunzmbanj gaiqraeuz bw, gijneix goj dwg vih ngoenzlaeng lwgnyez raeuz bw. Danghnaeuz mwngz guh ndaej daengz gijneix, vunzmbanj gyoengqraeuz ngoenzngoenz cang yieng hawj mwngz, lij daengj gaiq bei laux ndeu hawj mwngz dem, haenh mwngz daiz mwngz, aeu mwngz guh “yahva” daeuj saxcaeq. Vunzmbanj gyoengqraeuz daengznauq cungj nien mwngz gung mwngz.

Meuz ha, ciuhlaeng mwngz guh hak dang saeq vei. Mwngz itdingh baenz boux hak ndei ndeu, aenvih mwngz dwg canghgaebnou. Meuz ha, daengz seizde mwngz roxgeiq daeuj ndaw mbanj yawjyawj bw. Mwngz geiqmaenh bw, bakmbanj mbanj raeuz miz song go faexrungz, miz song go faexrungz hungloet couhdwg mbanj raeuz. Song go faexrungz de dwg faexsien bw, daj ngoenz baeuqyah raeuz ndaem de suenq hwnj, gaenq miz geij bak bi gvaq. Bouxgeq ndaw mbanj naeuz, gaxgonq Huz Cimingz ok henzguek Geu(Viednamz) haeuj Cungguek, youq laj goek song go faexrungz neix yietnaiq gvaq, daxboh cunhcangj soengq gvaq duix haeuxniu ndeu hawj de. Ndaek rin laux baihlaeng gorungz haenx lij miz hot sei Huz Cimingz aeu danq raiz baenz ndeu, coenzsei dwg aeu Sawgun raiz baenz. Canghson ndaw mbanj bae gaujcingq liux cix naeuz, hot sei neix dwg sei Huz Cimingz gyo’mbaiq vunzmbanj raeuz. Huz Cimingz dwg vunz ndei, doeklaeng, mbanj raeuz bouxboux dungx iek mbouj miz gijgwn, de caengz baij vunz soengq haeuxliengz daeuj dem. O, gangj lai gvaq. Mbouj naih, danghnaeuz mwngz ciuhlaeng dakseng guh hak le, mwngz cix fae Huz ndaej lw?

Meuz ha, dou niemh mwngz dahraix, goj caj mwngz dakseng doxdaeuj. Gou gyaemj doenghgij lwgnyez cojgvaq de gyo’mbaiq mwngz gonq. Meuz ha, gou ngaek gyaeuj baiq mwngz. Gizneix miz song duz bya- ndengj, dwg daj ndaw dah vax ndaej. Gou rox mwngz gyaez gwn. Mwngz gwn vei, meuz. Gou ngaek gyaeuj baiq mwngz lo.

Daeuj gwn vei!（2 sat）