Mwh seiz iq, gwnzmbwn mbanjranz dwg gij gingjsaek gou ceiq sug haenx.

Gou ciengzseiz naenghngae- ngae, dinghdingh yawj dujfwj hausak gwnzmbwn daj gizgyae mbin gvaq, yawj gij hoenz gizgyae youq mwh daengngoenz doek bya mbinngeungeu haenx. Seizhaenx, gou cungj gyaez caeuq gyoengq baengzyoux guhdoih, youq henz diuz dietloh vutfwz haenx ra dujva iq, gwih ci youq ndaw reihmeg angq dwk ndonj bae ndonj dauq, coh aen daengngoenz banhaemh yaek doek bya haenx haenqrengz buet bae. Mbwn sangvidvid, sawdiksik, gvangqyubyub, lumj mboujmiz bien mboujmiz haenz. Dou naengh youq gwnz haenznaz, sing riu sing angq mbouj dingz mbouj duenh, seizgan couh youq gizneix mbouj rox mbouj nyinh gvaqbae lo.

Doeklaeng, vihliux gouzhag, gou biek mbanjranz lo. Gwnzmbwn mbanjranz, mbouj caiq dwg gij yienghsiengq ciengzseiz raen haenx. Hoeng gou ciuqyiengh lij gyaez muengh gwnzmbwn. Gwnzmbwn dieg wnq, yienznaeuz fwj doenqyoedyoed mbinfefe、ronghngaeuz camca doxdaeb, hoeng beij mbouj ndaej gwnzmbwn mbanjranz gvangqlangh caeuq roxnyinh caenciet haenx. Moix baez daengz seizneix, gij yienghsiengq gwnzmbwn mbanjranz couh youq ndaw uk gou okyienh. Gou siengj, seizneix daengngoenz wnggai daj ndaw reih haeuxyangz doekroengz luba; gwnzmbwn wnggai bu rim dujfwj gyaeundei saekhau saekhoengz luba; boh’au ranznden cingq hat duzvaiz naj riunyumnyum baema ranz luba…… Aen vehmienh neix youq ndaw uk gou yap gvaq, hawj gou engqgya siengjniemh mbanjranz lo.

Doeklaeng, hagnieb ngoenz beij ngoenz naek, gou cix mbouj ndaej vangq bae dauqngeix gij yienghsiengq mbanjranz. Cijmiz youq ndaw fangzhwnz ndaej dauqma mbanjranz, ndiu le cij doeknaiq lemlem.

Gou deq mbouj gib yaek dauqma mbanjranz, bae gaek gij yienghceij mbanjranz haeuj uk moq. Gij daeng saekhoengz saekaeuj ndaw singz haenx ciuq rongh le gwnz goengloh gvangqlangh, hoeng gij reihmeg heuyauyau caeuq reih haeuxyangz henjrwgrwg mbanjranz neix, cij dwg gij gingjsaek ceiq gyaeundei ndaw sim gou. Mbanjranz gou couh lumj fuk sawveh raezrangh menhmenh mbehai ndeu, gou simgaenj dwk bae damqra, dauqdaej yawjraen le gij gingjsaek gou sug haenx.

Gou ndwn youq naj ranzgaeuq, ndaw hongh gaenq maj ok haeuxbaq, gou byaij daengz baihlaeng ranz, roeggae doeksaet yat mbin laeng ranz bae. Ndit raeujrubrub, rumz iq yaeng’yaeng ci naj gou. Fwj gwnzmbwn ciuqyiengh mbinfefe, cix mbouj rox yaek mbin bae mbiengj lawz. Benq mbwn gvengq lamz doenghbaez gou sug haenx, lumjbaenz deng caengz mok mbang ndeu cw nei, mbouj beij ndaej gaxgonq youh sang youh gyae lo. Ndaw doenghnaz gvangqlangh haenx caiq mbouj ndaej dingqnyi sing din vaiz byaij doebdoeb, doengh gij vehmienh sug haenx menhmenh bienq ndaej myoxmyad. Hoeng, mwh gou ngiengx gyaeuj yawj bae, yiemhranz ranznden ciuqgaeuq cingjcaez, go haeuxyangz lij ciuqgaeuq daengjswt. Gou sawqmwh rox, gizsaed gijmaz cungj mbouj caencingq gaijbienq, cij dwg seiz nyez gou gaenq gvaqbae lo.

Ndwenngoenz gvaqbae lulu, mbouj miz banhfap laengz de, couh lumj laengz mbouj ndaej dujva seizcin hailangh, laengz mbouj ndaej naesiet seizdoeng doekroengz. Aen mbanjranz gou, gij yienghceij gou gaenq sug haenx yienznaeuz gaenq bienq lo, hoeng de youh baenz le gij yienghceij lingh daih vunz louzlienh ndeu, baenz le gizdieg gyae’gyang youh ngah bae ndaw sim gyoengqde.

(Vangz Singhlinz raiz Veiz Yennaz hoiz)