Aucangh dwg goeng lauxsae ndeu, de vunzleih huzngaeh, sonsaw duiyouh le, daeuj gunghswh dawzdou, daengz seizneix ndaej haj bi lo.

Aucangh daeuj gizneix baenzlai nanz, mbouj raen lwgyah de daeuj damq de saek baez, de wnggai hix siuj ma ranz ba? Aenvih cawzliux bae haw cawx byaek, de ngoenzngoenz youq ndaw ranzdawzdou naengh. Bingz- ciengz baez daengz gunghswh, cungj raen de youq gizhaenx, mbouj dwg doeg saw yawj bauqceij, couhdwg lienh sij sawmauzbit, mboujcix caeuq vunz gangj gojgaeq, de lumjbaenz miz haujlai gojgaeq gangj mbouj rox liux. Roxnaeuz de mbouj miz vunzcaen, dwg ndaek vunzgyonz gag youq ndeu?

Danghnaeuz ngoenzsinghgiz mbouj bae gunghswh gyaban, dingjlingz bungz daeglan Aucangh, lij laihnaeuz Aucangh caendwg goeng vunzgyonz fouz lwg fouz caen ndeu dem!

Ngoenzneix gwn ngaizromh gvaiz lai, banringz roengzban gou couh mbouj ma ranz gwn haeux lo. Gou bae ranzdawzdou, siengj dingq Aucangh lwnh gojgaeq.

“Gou bingzciengz mbouj youq ranz ninz! Seiz hwnjban song lwgnyez gou couh youq hagdangz ninz, duiyouh le couh youq gizneix youq!” Aucangh miz di simnaiq naeuz:“Danghnaeuz gunghswh mbouj hawj gou dawzdou lai, gou couh bae baihrog co ranz youq!”

“Mwngz vih gijmaz miz ranz mbouj ma ne?” Gou miz di geizheih.

“Aenvih……Ndaw ranz gou miz song meh guk!” De hoz ndaeng- ngaeungaeu naeuz.

“……” Gou ngoemxngwd lo.

Aucangh dawz aen cung gaeuq de hwnjdaeuj, gwn gaemz raemx ndat ndeu, dawz aenfa goeb ndei, nyinhnyinh conghhoz le caiq menhmenh lwnh okdaeuj.

Laeng Aucangh dwg seiq daih lwgdog, hagsib、guh hong caeuq aeuyah cungj aeu dingq daxboh daxmeh de gangj, daegbied aeu dingq daxmeh de baijbouh, de yienznaeuz euq gvaq, hix deuz ranz gvaq, hoeng cungj mbouj miz yungh. Aenvih daxmeh de rwix lai, laeng yahdaiq hix ak lai, de guh gijmaz cungj deng gyoengqde gaemguenj, seizseiz cungj ndaej gaemh’ep de!

Daj de doeg daihhag hwnj, Aucangh couh miz dah youx ndeu, song boux de cungj naemj doxcaez baenz gya baenz dangz. Song boux de bizyez ra hong le, youh caemh aen danhvei ndeu, mwh songde baijbouh ndei rugmoq, senj ndei ngoenzndei yawhbwh bae lingx cingq, daxmeh de fwtfat saet daeuj ndaw singz ra de, vetbyangbyang mbouj hawj songde gezvwnh, cigciep fok naeuz:“Danghnaeuz mwngz gamj aeu dah lwgsau neix guh yah, gou couh dai youq ndaw rugmoq mwngz hawj sou yawj!”

Doiq youx doxrox doxmaij haenx, couh yienghneix deng daxmeh de nyengh aeu ceksanq bae lo! Aucangh vanzlij ngaiz vuenh faenh hong gihgvanh danhvei de dem, diuh de bae daengz diegseng aen hagdangz ndaw mbanj ndeu son lwgnyez! Gij vi gij ndaenq de mbaet youq ndaw dungx mbouj miz dieg okheiq, cijmiz ngoenzhwnz gwn laeuj siu heiq, caeuq laeuj doxbuenx ngoenz gvaq ngoenz, mbouj rox miz geijlai baez, hix geiq mbouj ndaej liux lo, baez laeuj singj le cij fatyienh cihgeij mezsez youq henz congz.

Diuh dauq ndaw mbanj mbouj geijlai nanz, daxmeh Aucangh couh gag guhcawj, aeu dahlwg dahnuengx ranzhenz de hawj Aucangh guh yah, dah yah neix yienghsiengq mbouj sau saek di, vunz goeg ndang hung lumj cwzvaiz, hab guh hongnaz hongreih.

Gawqyienz boux caen ndiep caen gyaez mbouj miz lo, aeu bouxlawz mbouj dwg ityiengh? Aucangh hix mbouj caiq guengzcak, hix mbouj caiq euq lo. Daxmeh de haida sajbaizciengz, hawj de banh ciengz laeuj hoengh ndeu youq seiqcawq henz mbanj coengzlaiz mbouj miz gvaq, hoeng gezvwnh ngoenzhaenx de mbouj bae vwnhlij yienhciengz. De mbouj rox dauqdaej dwg byawz youh dwg baenzlawz soengq de haeuj ndaw rugmoq bae. Hix mbouj rox gvaqlaeng mwhlawz miz daeglwg ndeu, seizlawz baenz goengbaeuq liux lo!

Aucangh ngamq geiqndaej ceiq cingcuj dwg vwnhlij ngoenzlaeng, de couh buen bae daengz ranzhag, bouxdog gag youq lo, itcig youq daengz haj bi gaxgonq duiyouh. Youq duiyouh haemhgonq, de gaenq ra vunz bang de youq ndaw singz ra ndaej faenh hong neix, gij gyadangq de hixdwg youq ranzhag cigciep soengq daengz ranzdawzdou gunghswh daeuj.

Mwhhaenx lij youq ndaw ranzhag, daxmeh de ciengzseiz daiq mehyah de daeuj hagdangz gangj saeh, hix yaep mbouj seiz yaeujyak daeglwg manzgyaengj de gvaqdaeuj hawj de guenjgyauq, caemh daiq daeglan de daeuj daengz hagdangz hawj gyoengq doengzsaeh de yawj, naeuz de gaenq dang goengbaeuq liux lo, lij dwg mbouj leix mbouj langh gyaranz. Mbouj guenj daxmeh baenzlawz loengh, doiq de daeuj gangj cungj mbouj dajgaenj, de senqsi simcit lumj hoi.

“Ciuhvunz gou lix dangq dai, saedceij gvaq ndaej camzsim coegsaej, mbouj miz saek di eiqsei, gwn ngoenz suenq ngoenz lo!” Aucangh gvaengzda nding aeng.

“Mwngz caeuq daxheiz lienzhaeh gvaq lwi?” Gou cam.

“Gaxgonq sij saenq geiq hawj de gvaq, rox de saedceij caemh gvaq mbouj ndei!” Aucangh raemxda rimmbummbum, yaek rih okdaeuj lo.

Ndaw sim gou miz mwngz, ndaw sim mwngz miz gou, doxmaij mbouj ndaej doxaeu, bouxwnq mbouj miz banhfap gamjsouh daengz gij siengsim haenx.

Miz vunz, doxnaek mbouj ndaej doxaeu, cijmiz cuengq youq ndaw dungx coeg saej coeg sim.

Miz vunz gyaez, youh aeu mbouj ndaej, cijmiz gyaez baenz lanzcienh, gyaez ndaej siujsim riri!

Caeuq Aucangh gangjgoj seiz, gou fat saenqsik hawj dah baengzyoux ndei gou, de youq ranzcoj Aucangh dang fucincangj, cam de rox mbouj rox gij gyasaeh Aucangh.

Dah hujgeiq ndei gou naeuz:“Cingq youq ranz de cawqleix gij saehcingz neix ne.”

“Aucangh, mwngz siengj ma ranz yawjyawj lwi?”

“……” Aucangh caembyam- byam mbouj gangjvah.

“Daxbuz bineix ndaej geijlai bi……”

“Goujcib it bi!” Gou cam vah mboujcaengz sat, Aucangh couh ciengj hoizdap naeuz:“Geij ngoenz gonq, de laemx baez ndeu, ndokgumq raeksoiq lo!”

“Yienghneix mwngz couh ma ranz yawj daxbuz baez ndeu ba!”

Ndithaemh veqciuq haeuj gyanghongh, meh youq ndaw rongz muengh lwg dauq!

“Ndei!” Aucangh mbouj miz saek di yupyawj.

“Boh’au, cuengqroengz ba!” Caih daxmeh de doxsaek doxsaeuq, doxienq doxhaemz, ciuhvunz yaek gvaq bae caez lo, hix wnggai cuengqroengz loba!

“Ndei!” Aucangh raemxda rih roengz naj daeuj, lae gvaq vangraeh, de hix goq mbouj ndaej uet lo.

Aucangh ndwn hwnjdaeuj, byaij haeuj ndaw rug bae, song fwngz saenqnyaeunyaeu dawz aen hab nyaeq ndeu okdaeuj, dajhai baez yawj, ndawde yo miz aen haedfwngz ndeu.

“Bang gou vut aen haedfwngz neix bae ba!”

“Ndei le!” Gou ndwn hwnjdaeuj, dawz aen hab coux haedfwngz doengzcaez ndek haeuj aen doengjnyapnyaj henzloh bae, mwhneix aen civanzvei ngamq hai gvaqdaeuj beuj nyapnyaj.

Ngoenzlaeng gou daeuj hwnjban, yawjraen ranzdawzdou damq okdaeuj boux najseng ndeu.

Dingqnyi Aucangh ma ranz lo! Ngoenzlwenz banringzgvaq, daeglwg de hai ci gvaqdaeuj buen gij gyadangq de bae ranz lo!