Sai:

Caet nyied caet daeuj daengz,

Gou saengz(gyaez) mwngz ngi’ngaek,

Gou naek mwngz ngi’ngaeu,

Seizlawz daeuj caemhranz.

Mbwk:

Vunz ndaem duh baenz duh,

Raeuz ndaem duh baenz gaeu,

Vunz baeyoux doxaeu,

Raeuz doxlienh gvaq ciuh.

Sai:

Raemxdah mboek daengz daej,

Daek mbouj ndaej raemx gwn,

Ndaw sim gou miz mwngz,

Song fwngz gaem mbouj youq.

Mbwk:

Baihgwnz fwnz cuengq raq,

Lajdeih vunz dai iek,

Raemxdah laefiegfieg,

Ce duzngieg gak vaengz.

Sai:

Raemxdah rox ndaej mboek,

Bya’ndoek rox dok gaeu,

Deq mwngz maij cij aeu,

Songraeuz gaenq doxduenh.

Mbwk:

Raemxdah mboek daengz daej,

Roeglaej roengz gip sae,

Songraeuz caen doxmaez,

Baedauq dawz sim dog.

Sai:

Goenhgim miz baenz doiq,

Soijgim miz song ga,

Songraeuz baenz gvanbaz,

Laepda daeuj guhdoih.

Mbwk:

Gangj lai hix dwg gyaj,

Gohaz mbouj baenz coeng,

Mwngz miz sim hwnjroengz,

Hwnjmbwn sim doeng(hix) nyienh.

Sai:

Beix mbouj gangj vahgyaj,

Mbouj ce naz raemx ceh,

Nyienh ce boh ce meh,

Mbouj ce nuengx gag youq.

Mbwk:

Nyienh ce reih hwnj haz,

Nyienh ce naz mbouj raeq,

Ngoenz gwn cib ngoenz daej,

Ndaej caemhranz cij baenz.

Sai:

Nyienh ce reih hwnj haz,

Mbouj ce naz lajmboq,

Nyienh ce meh ce boh,

Mbouj ce loh raeuz fwz,

Mbwk:

Nyienh ce reih hwnj haz,

Nyienh ce naz hwnj foenh,

Cij aeu cingz mbouj goenq,

Mbwn doemq hix mbouj lau.

Sai:

Gaxgonq raeuz cix gangj,

Roxnyinh mbangj mbouj meiz(miz),

Vahgangj coenzcoenz ndei,

Mbouj ngeix raeuz doxbyag.

Mbwk:

Gaxgonq raeuz dwg gangj,

Gvaq mbanj mwngz cix lumz,

Seizneix goq gya hung,

Mwngz lumz gou liuxnauq.

Sai:

Ciuq gij vah mwngz gangj,

Dwk govangh hix dai,

Ciuq gij fwen mwngz gvai,

Dwk gou dai roengz namh.

Mbwk:

Ciuq gij vah mwngz gangj,

Dwk govangh hix dai,

Gij fwen dou mbouj gvai,

Nanz dwk dai roengz namh.

Sai:

Ciuq gij vah mwngz gangj,

Dwk govanj ok feiz,

Ciuq gij vah mwngz ndei,

Hawj gou geiq daengx ciuh.

Mbwk:

Ciuq gij vah mwngz gangj,

Dwk govanj ok feiz,

Ciuq gij fwen mwngz ndei,

Hawj gou ngeix daengx ciuh.