Seiz lij iq, ranz gou hoj lai, baez daengz ngoenzciet gig noix ndaej gaj gaeq gaj bit gwn, baez raen ranz bouxwnq miz gwn, dou geij beixnuengx cungj ngah yaek dai.

Geiq ndaej bihaenx caet nyied cocaet, dienheiq gig ndat, ranz gou ciengx geij duz bit, gij bit haenx bwn youh ngaeuz youh ndongq, hawj vunz yawj dwk maez bae, hoeng daxboh naeuz bang bit haenx yaek gai aeu ngaenz guh ngaenz doegsaw gou, mbouj ndaej gaj gwn.

Ngoenzhaenx banhaet, aen daengngoenz lumj aen gyongdoengz deng feiz coemh nei hoengzhwdhwd, daj baihdoeng swng hwnjdaeuj, ciuq dwk ndaw mbanj ronghsagsag.

Vunzmbanj youq doenghnaz ndaem miuz haeuxngeih. Daxboh haetromh couh gwed cae raek rauq yien vaiz ok dou bae guh hongnaz, daxmeh daenj gyaep raek mbaij gaen laeng bae ndaem naz, sawqmwh daxmeh cienq gyaeuj doxdauq doiq gou caeuq daegnuengx naeuz:“Aeu roengq daeuj gyaeng bit, haemhneix raeuz gaj bit gvaq caet nyied cocaet!”

Dingqdaengz haemhneix miz nohbit gwn, gou iet linx rizriz fwijbak, daegnuengx hix ndwnj myaiz gyoeggyoeg, lumjbaenz gij hom nohbit gaenq daj byailinx cienz daengz byaindaeng daeuj nei. Dou gaenq haujlai nanz mbouj ndaej gwn noh lo.

Ndit ndatnde’nde, ciuq haeuj baihlaeng daeuj, ciuq dwk gij raemx ndaw naz hix ndat dwk din vunz yaek logsieng bae.

Daxboh rauq naz sat le couh ganjgip ndaemnaz, daxmeh bau loek gyaj, gou mbouj rox ndaemnaz, hoeng vihliux ndaem liux vaiq di, hix roengzbae bang ndaem. Daegnuengx youq haenznaz caemz namh, seiz mbouj seiz hix nauh baenzneix baenzde, daxmeh uet gaemz hanh ndeu naeuz:“Duziek naengh conghhoz lo, caj daengngoenz yaek roengz congh le raeuz caiq ma ranz gaj bit, cawj haeuxdangbit gwn.”

Daengngoenz lij youq gwnz dingjmbwn ciuq dwk ndatnde’nde, yawj raih naz gvangqlanglang haenx, hix mbouj rox seizlawz cijndaej ndaem liux?

Banringzgvaq, daxboh yawjyawj byai mbwn, naeuz:“Sou beixnuengx ma ranz gaj bit gonq.”

Dou angq lumj roeg ok rongz, saetsaet diuqdiuq buet ma ranz. Byaeu feiz、 dwk raemxndat、 hai faroengq, daegnuengx coemj gvaqbae gaemh dawz song faj ga duz bit haenx riuhehe, duzbit fan gyaeuj doxdauq siemj dawz aennaj daegnuengx, de in dwk swenjngaungau, hoeng de dailix hix mbouj cuengq fwngz.

Gou dawz caxbyaek nyeuq haeuj rinbaenz bae “gyaedgyaed” song mbat, hag gij yiengh daxboh bingzciengz gaj bit haenx, fwngz ndeu gaem gyaeujbit, fwngz ndeu ciemz bwn lajhoz duzbit. Gou ngamq yaek dawz caxbyaek heh haeuj hoz bit bae, duzbit sawqmwh yungh rengz baez bongx fwed, bongx deng haeuj da gou daeuj, gou roxnyinh lwgda baez laepnyam, caxbyaek doek roengz gwnz namh bae, caiq hai da, raen daegnuengx gaem gabit hix deng lot fwngz lo, duzbit bek fwed bongh ok bakdou, mbin roengz ndaw daemz bae lo.

Gou caeuq daegnuengx buet okbae, hoeng gizlawz gyaep ndaej dawz dem, daegnuengx sim’in dwk daejngaungau, raemxda hoij rim naj naeuz:“Haemhneix mbouj ndaej gwn gabit lo !”

Dou aeu haeux bae lox duzbit, cimh faexsaux raez bae gyaep duzbit, yungh rin ndek…… Hoeng caih dou baenzlawz guh, duzbit haenx deng yiep gvaq le cungj mbouj hwnj haenz daeuj. Doeklaeng cijndaej raemxda doekbyogbyog ndwn youq gwnz haenzdaemz yawj duz bit haenx heuh “ga ga” youq ndaw daemz youz bae youz dauq.

Banhaemh, daxboh caeuq daxmeh ndaemnaz ma ranz, yawjraen ndaw ranz laepsaengsaeng, daegnuengx doq got haeuj rungj daxmeh bae, “nga” sing ndeu daej hwnjdaeuj. Daxmeh yungh fajfwngz cocatcat de mo gyaeuj dou nai naeuz:“Gaej siengsim, ngoenzneix caet nyied cocaet, baenzlawz hawj lwg gou gvaq ndwi ni?”

Daxmeh yienghneix baez naeuz, daxboh gaeugaeu gyaeuj le dawz dienhdoengz byaij ok dou bae lo. Byonghhwnz daxboh ndang dumz- soebsoeb dawz duz bit ndeu dauq ranz, mbouj rox de yungh bae geijlai goengfou cij ndaej gyaep dawz duz bit haenx, hoeng doeklaeng guh bae guh dauq daengz gyanghwnz cijndaej gwn caeuz.

Haujlai bi le, gou daengz ndaw singz guhhong, bi daengz caet nyied cocaet, noh bitbizsiuj、 nohbitsaz、 nohbit iemraemxgyu, naemj gwn couh gwn, hoeng cungj nyaenx mbouj ndaej siengj daengz bihaenx caet nyied cocaet donq haeuxcaeuz haenx.

Seizneix, gou dawz aen gojgaeq neix lwnh hawj dah lwg gou nyi, de dingq le byaengq lwgda cam naeuz:“Sou vih gijmaz mbouj rox diemj vaimai ni?” Gou riunyumj momo aen gyaeuj de.

Youh daengz caet nyied cocaet lo, gou cingq naemj baenzlawz gvaq, dahlwg miz siusik daeuj lo:“Boh, gou hong nyaengq lai, bineix caet nyied cocaet gou mbouj ndaej dauqbae lo, gou gaenq dingh aeu song duz Bwzgingh gaujyaz, daengzseiz gvaidi bae hawj sou, sou mbouj yungh caiq cawx gijmaz lo, mwngz caeuq daxmeh daxgoeng daxbuz couh angqangq yangzyangz gvaq ciet ba.”

Seizdaih baenaj, aen seiz lwgnyez ra gwn mbouj miz caeuq ngoenz caet nyied cocaet ndit ndatfwdfwd yaek remj vunz haenx caiq hix gyaep mbouj ndaej dauq lo.