Youq mwh Cungguek bouxminz gang Yiz cancwngh nem seiqgyaiq fanj Fazsihswh cancwngh ndaejhingz 80 hopbi daeuj daengz gaxgonq, Gvangjsih gak dieg hopndaet aen cawjdaez “geiqmaenh lizsij、geiqniemh senhlez、inmaij hozbingz、haicauh coglaeng”, doxcaeuq lai bouhmonz、naeuz daengx biengz, comz guh baenzroix yienghsaeh geiqniemh lailanglang, doinyoengx gihyinh saekhoengz haeuj uk haeuj ngviz, hawj gij cingsaenz dingjhoenx hungmbwk youq seizdaih moq doxcienz roengzbae.

“Mbawmbaw siengq raeblaeng, cungj dwg duenh lizsij mbouj ndaej lumz ndeu ha！” Ndaw ginhsijgvanj dieg capyouq Yilinz Ginhfwnhgih, fuk dem fuk siengq lizsij dijbauj、 gienh dem gienh doxgaiq caen miz ndaejgeiq, hawj gyoengqboux binggeq dingzdin cimyawj. Gyoengqde seiz mbouj seiz lwnh gij gojgaeq gwnz ciengz dwkciengq bihaenx, gyoengq guenbing coz henzgyawj haeujrwz dingq, dingq dwk cungj baiqfug gyoengqde raixcaix.

8 nyied ndawnyieb, Yilinz Si Duiyiz Ginhyinz Swvu Giz doxcaeuq lai bouhmonz guh baenzroix yienghsaeh “binggeq haeuj ginh- yingz”, gij yienghsiengq baenzneix ciengzseiz raen. Ndaw hozdung, mwh hagseng daiqbiuj soengq va iet soh hwet, mwh guenbing gingqlaex yiengh biucinj doenghgij neix, cungj lwnhnaeuz aeu gingqeiq yinghyungz.

Gwnz Sanhgyangh Dungcuz Swciyen Dohyeh Gvangjcangz, langhbaij mbawsiengq mizgven hoenxciengq ciuyinx haujlai vunz daeuj yawj. Luz Cicungh binggeq ndaej 95 bi haenx hawj lwglan fuz daeuj, ndwn nanznanz youq baihnaj mbawsiengq gaeuq gang Yiz yiyungjginh Dungcuz okciengq, ndaw da cungj dwg ndaejgeiq.

Gvansim binggeq dingjhoenx, dwg ceiq cigsoh geiqmaenh lizsij. 8 nyied 22 hauh, Swcigih Duiyiz Ginhyinz Swvu Dingh gyoengqvunz bae camnai yawjngonz Vangz Baujfu binggeq dingjhoenx ndaej 98 bi haenx, dawz mbaw cieng geiqniemh “Cungguek Bouxminz Gang Yiz Cancwngh Ndaejhingz 80 Hopbi” hawj de, caemhcaiq caeuq de gangjgoj. Youq Mungzsanh, Duiyiz Ginhyinz Swvu Giz aen yienh neix hix heuh vunz bae camnai, gyoengqde caeuq gyoengq canghyw haeuj ranz, bae nyinhcaen cazyawj ndang Vangz Swzlieng binggeq dingjhoenx ndaej 103 bi haenx mbouj aeu ngaenz; Gveilinz Si Duiyiz Ginhyinz Swvu Giz baij vunz soemh fwn bae daengz Lungzswng Gak Cuz Swciyen, aeu fujsizginh soengq daengz ndaw fwngz vunzranz boux lezsw dingjhoenx Siz Sinzyou.

Yienghsaeh geiqniemh ndaw- biengz gak hangz gak nieb caemh hoizyiengj huhu, aenbiengz cingq guhbaenz gagrox aeueiq baiqfug yinghyungz、gvansim binggeq.

Gveigangj Si giyezgyah Veiz Swjdai aenvih mwh coz ndaej bouxbing bangcoh gvaq, ciengzseiz geiqmaenh aeu bienzngeiz hawj vunzranz bouxbing. Ndawde, doiok ranz bienzngeiz cienmonz hawj bouxbing duiyiz. Hozbuj Yen gwnz aen yinhyozvei “byadah geiqmaenh gij sing hozbingz”, mwh dizginz iq habyienj 《Habhoz》 yiengj hwnjdaeuj, coenz swzgo “byadah bingzan, hoenzfeiz bingzciengz” hawj lajdaiz mehmbwk Cinz doek raemxda：“Daxgoeng gou dwg binggeq dingjhoenx, de ciengzseiz naeuz, ndwenngoenz ndei seizneix, cungj dwg gyoengqde bihaenx deqmuengh.” Youq Gvangjsih Gwzming Geiq- niemhguenj, gyoengq “bouxgangjgej iqet” cingq gangj gij vah dwggyaez soemswd, lwnhgangj gij gojgaeq dingjhoenx lezsw bonjdieg hawj bouxyawj, cehfaen saekhoengz youq ndaw uk ndaw hoz lwgnyez laeglemx dokngaz.

Daj binggeq gangj gij saehgonq mbouj bingzciengz, daengz beksingq ndaw hoz geiqniemh, Betgveiq daihdeih aeu aen dem aen gojgaeq ronghsien, aeu lizsij ndaejgeiq deugaek laeglaeg bae. Ndaw doenghgij gojgaeq neix, miz vutmingh, miz henndei, engq miz cienzswnj, gikcoi lwg Betgveiq seizdaih moq, youq gwnz roen moq haenqguh baenaj.

（daj 《Gvangjsih Yizbau》 aeu daeuj hoiz Liuz Li Liuz Dwzanh Cuh Yenjhih）