Daxdaiq yienznaeuz gaenq ndaej caetcib bi, hoeng cungj gaij mbouj ndaej gij sibgvenq “ged”de.

Gij Saeh “Ged Raemx”

Daxdaiq “ged” cungj mbouj sij ndaej dauj gij raemx yungh gvaq haenx bae. Ndaw diengzhaex ndaw ranz, gij doengjraemx aen hung aen iq cungj baij rim liux, ndaw doengj coux rim gij raemx saeg buh、raemx swiq byaek、raemx swiq vanj…… Daxdaiq yungh gij raemx saeg buh mad deihbanj, yungh gij raemx swiq byaek、raemx swiq haeux rwed va, yungh gij raemx swiq vanj cungswiq gizdieg okhaex. Gou mbouj leixlangh gij “ged” daxdaiq, oknyouh okhaex ndaej le, cungj swnhfwngz baez nyaenj,“va”sing ndeu, gij raemx ndaw siengraemx deng gou cuengq liux bae. Moix baez daxdaiq dingqnyi le, cungj sikhaek buet gvaqdaeuj, swenj naeuz:“Lwg fangzbyaiz neix, naeuz mwngz lai mbaet lo, oknyouh okhaex sat le aeu yungh gij raemx ndaw doengj neix cung haex cung nyouh, gaej sai gij raemx ndaw siengraemx!”Gij vah daxdaiq doiq gou daeuj gangj dwg“rumz bien rwz”, gou mbouj gaij saekdi lij ciuqyiengh lumj gaeuq nei. Doeklaeng, daxdaiq nyaenx mbouj ndaej lo, de“hai ciu”lo, de gven gaiqcab guenjraemx baihlaeng diengzhaex haenx mbouj hawj raemx haeuj diengzhaex lo, gou mbouj ndaej mbouj ei de lo. Daxdaiq mboujdanh guenj gou mbouj hawj gou sai raemx, de lij guenj goengda yungh raemx dem. Gaxgonq, goengda rwed va cungj yungh swlaizsuij rwed, daxdaiq “ged”raen le, ndaw bak damzbyoedbyoed naeuz:“Mwngz ndaek goenggeq neix, yungh swlaizsuij rwed va mboujdanh sai raemx, youh mboujmiz yingzyangj, mwngz mbouj rox yungh gij raemx swiq haeux rwed va doiq gova engq ndei ma?”Deng daxdaiq hongz le, goengda hix guhbaenz aen sibgvenq ndei mbaet yungh raemx, moix baez rwed va cungj yungh gij raemx swiq byaek roxnaeuz gij raemx swiq haeux rwed.

Gij Saeh “Ged Dienh”

Daxdaiq mboujdanh “ged raemx”,lij “ged dienh” dem. Daxdaiq dajcawj seiz danghnaeuz ndaej haicueng couh mbouj hai aen youzyenhgih; doengxhaemh yawj densi soqlaiz mbouj hai daeng gvaq; mboengq ndat soqlaiz mbouj hai gunghdiuz, couh lienz aen denfunghsen hix mbouj hai. Seizhah ndatfwgfwg, gaiqbeiz mbouj liz fajfwngz daxdaiq gvaq. Goengda mizseiz dingj ndat mbouj ndaej, siengj caegcaeg hai gunghdiuz seiz, cix deuz mbouj gvaq fouq da “ndongqrongh”daxdaiq, doeklaeng mboujdanh mbouj ndaej ci gunghdiuz, lij deng daxdaiq ndaq can he. Vihneix, goengda hix ciemhciemh mboujcaiq naemj hai gunghdiuz lo, ndat lai couh hai doulaux, buen aen daengq iq naengh youq bakdou, ci gij“rumz gvaq lajranz”. Mboengqgonq, daxdaiq dingqnaeuz yungh gij daeng heuh LED haenx youh ronghsag youh mbaet dienh, de heuh daxboh youq gwnzmuengx cawx haujlai aen ma, dawz gij daeng ndaw ranz cungj“vuenh najmoq” caez.

Gij Saeh “Ged Danq”

Daxdaiq “ged” cawx byaek soqlaiz mbouj yungh daehgyau, moix baez okdou cungj riuj aen daehbaengz he. Couh lienz gij ceij yungh gvaq haenx, daxdaiq hix mbouj cuengq gvaq. Moix baez gou sij cozyez guh caujgauj seiz, daxdaiq cungj mbouj hawj gou yungh gaujceij moq, nyengh heuh gou yungh gij ceij sij gvaq mbiengj ndeu haenx daeuj sij. Deng daxdaiq yingjyangj, gou hix roxyiuj dawz bonj gaujceij yungh gvaq haenx ce roengzdaeuj, dawz daeuj lienhcih roxnaeuz niemhsuenq. Daxdaiq ndangdaej mbouj ndei geijlai, de ciengzciengz bae aen bouqyw liz ranz gig gyae he cawx yw. Daxdaiq cungj mbouj hawj daxboh hai ci soengq de bae cawx yw, nyengh cihgeij gwih danci bae, moix baez dauq ranz cungj hanh rim gyaeuj rim ndang. Dou cungj gienq daxdaiq naeuz:“Mwngz baenz geq lo, baenzneix nyen guhmaz? Ranz raeuz gwndaenj hix mbouj ca, wnggai yiengjfuk lo!”Byawz rox daxdaiq cix yienghneix han naeuz:“Sou mbouj yawj gwnz densi gwnz bauqceij ciengzciengz gangj ma? Seizneix goekraemx noix haenq lai bw, caemhcaiq daengx biengz dienheiq bienq raeuj, hoengheiq yied daeuj yied deng uqlah haenq, raeuz caiq mbouj haeujsim mbaetyungh gemjnoix saehlah, gij gwndaenj raeuz lij miz maz vuenyungz? ”

Laxlawz, daxdaiq “ged”dwg vih baujhoh vanzging! Daj neix hwnj, dou daengx ranz vunz caiq hix mbouj naeuz daxdaiq “ged” lo, cungj heuh de guh “daxdaiq vanzbauj”!

(Vangz Yiningz raiz Danz Hijvah hoiz)