Ranzmbanj gou youq henz daemz laj dinbya, miz go faex hung sangvidvid ndeu. Gij nga gij mbaw de cungj mwncupcup， laj goekfaex raemhrwdrwd. Banngoenz gwnz faex duzroeg mbin bae mbin dauq, banhaemh vunzmbanj youq baihlaj yietnaiq, vunzlaux dwkgeiz、dwkbaiz、 gangjgoj, lwgnyez gvaengz faex doxgyaep doxlaeh nauhyied dangqmaz. Daengz gyanghwnz cib diemj cung vunzlai cij sanq deuz ma ranz.

Gyoengqvunz deuz caez le gofaex seiqhenz caemliglig, mwhneix cix miz duz roegguj ndeu ma gwnz faex neix youq, gyanghwnz cungj heuh “gugu”, mizseiz lwgnyez dingqnyi lij miz di lau. Hoeng bouxgeq cungj lwnh lwgnyez naeuz duz roegguj neix haemhhaemh cungj gaeb ndaej haujlai nou, dwg duz roegik bw gaej lau de. Duz roeg neix banngoenz da yawj mbouj raen, mbouj rox youq lawz boemz youq, daengz haemh cij okdaeuj. Da de youq ndaw laep yawj ndaej cingxrikrik, baez yawjraen duznou duzngwz, couh aj fwed cung roengzbae gaeb dawz cix bak haeb nyauj cek, gwn imq youh dawz ma guen duz lwg de. Haemh daengz heuh “gugu” duznou duzngwz mbouj gamj ok congh, vunz byaijroen mbouj lau ngwz haeb, gohuq hix mbouj deng nou gwn. Duz roeg neix yomjyomj baujhoh reihnaz, hawj vunzmbanj ndaej demsou.

Hoeng gvaq mbouj geijlai nanz, miz vunz haeuj mbanj sou faex guh fwnz, vunzmbanj nyinhnaeuz ndaej ngaenz lai, couh gai go faex haenx bae lo. Daj seizhaenx hwnj caiq mbouj raen duz roegguj neix dauqma, ndaw mbanj duznyaen youh dauqcawq ndonj, caemhcaiq ndaw reihnaz engq lai. Vunzmbanj ngaiz lai bae goq reihnaz, haemh ninz hix mbouj lumj gyaeuh onj. Bouxboux cungj naeuz ienqhoij youh hojsik. Doeklaeng ndaw mbanj youh aeu dinfaex daeuj ndaem, maqmuengh daengzcog duz roegguj dauq youq roxnaeuz gij roegik wnq daeuj ndaw mbanj youq. Caen dwg dwgriu lai lo vahsug naeuz: Senq rox yienghneix hozbiet codaeuz.