Liggaeuq caet nyied cocaet gyanghaet, gwnz bya bakgeuq Mbanjcuengh cungj miz rang va biu daeuj rangfwdfwd. Gyoengq yahgeq caeuxcaeux dawz aen lamz ndeu hwnj bya bae aeu “caet yiengh byaek”——Va’gva、nyodduhnoh、mbuqho、hazhom、go’ngaih、mbawreiz caeuq mbaw gorenh. Dingqgangj gij raemxraiz ngoenzneix hamz heiqsien, yungh caet yiengh byaek neix daeuj cienq, aeu gij raemxraiz haenx daeuj swiqndang, ndaej swiq gij cuij gwnz ndang bae, hawj fwngz lwgsau lingzleih, hawj din lwgmbauq miz rengz.

Youq gyanghongh, gyoengq lwgsau baij ndei congzrok. Gij mae hajsaek youq ndaw daeuq ndonj bae ndonj dauq, daemj baenz naj man ndeu, gwnz man miz gij dozanq dahmbwn: Gij saek heunaunau dwg aen mbwn gyanghaemh, gij henjrwdrwd dwg aen ndaundeiq ronghmyanmyan, gij baengz ndinghoengz dwg gagiuz vang gvaq gwnz dah——Bouxcuengh gangj naeuz neix dwg giuzroeglaej, beij ndaw cienzgangj engq nauhyied. Henzgiuz cungj siuq miz duzgaeq gamz aendom, youq ndaw da Bouxcuengh, neix dwg duz roegsaenz daiqroen Niuzlangz caeuq Ciznij.

“Gaxgonq a, miz boux langh cwz ndeu heuhguh Ahniuz, bohmeh de dai caeux, cijmiz duzcwz buenx de.” Mwh daemjrok, gyoengq yahgeq cungj gangj aen goj riuzcienz ndaej cienbi haenx. “Duzcwz rox lumj boux vunz nei, de rox dahsien gwnz mbwn daemj baengz mbwq lo, couh maij daeuj aen raengz laj dinbya swiqndang. Duzcwz couh laeglemx doiq Ahniuz naeuz: “Cijaeu mwngz dawz geu buhnding ceiq ndei haenx diem hwnjdaeuj, dahsien couh louz roengzdaeuj guh yah mwngz.”

Gvaqlaeng, dahsien caen baenz yah Ahniuz, de son lwgsau Bouxcuengh daemj baengz, yungh gij fwjnding henz mbwn daeuj nyumx baengz, daemj gij baengz ndaej ingj rongh gwnz mbwn laj deih. Hoeng mbouj geijlai nanz, Vangzmuj Niengzniengz rox lo, couh baij gij bing gwnz mbwn daeuj gaeb dahsien dauq bae gwnz mbwn. Duzcwz geq yaek dai seiz, de naeuz Ahniuz: “Mwngz bok gij naeng gou nyib baenz gouh haiz ndeu, couh ndaej dieb youq gwnz fwj gyaep hwnj gwnz mbwn bae.” Ahniuz daenj gouh haiznaeng, aemq doiq lwg de couh gyaep daengz gwnz mbwn bae. Yaek gyaep dawz seiz, Vangzmuj Niengzniengz youq gwnz gyaeuj loek ok fag cam ndeu baez veh gvaqdaeuj, sikhaek veh baenz ga dah raemxlangh gig laux ndeu dangj youq dangqnaj Ahniuz——Neix couh dwg “dahmbwn” Bouxcuengh naeuz haenx.

Gij sing daej gingdoengh geij bak duz roeg song henz dah, youq caet nyied cocaet ngoenz- haenx, bang roeg neix couh mbin daeuj dak baenz ga giuz ndeu, hawj Niuzlangz caeuq Ciznij doxcomz doxraen……

Daengngoenz doek bya lo, haemh caet nyied cocaet Mbanjcuengh cij suenq hainduj, lwgnyez dawz aen daeng makbug youq gyangluengq buet bae buet dauq, gij rongh henjnding henj- nding ingj coh aen naj riu lwgnyez, lumj baenz aen baenz aen ndaundeiq rox buet nei. Bouxlaux cix youq gyanghongh baij congz, aeu nyiedbingj、gyoij daeuj baiz, cawzliux gijneix, itdingh aeu miz duix “haeuxnaengj caetsaek” ndeu, saeknding dwg aeu gosoqmoeg daeuj nyumx, saekaeuj aeu gonya daeuj nyumx, saekhenj dwg vamai nyumx, caetsaek doiqwngq caet boux dahsien, hix siengcwngh gwndaenj yienghyiengh miz caez.

Daengz gyanghwnz lo, bouxgeq couh rag lwgnyez daengz laj gyaq makit, naeuz mboetcaw couh dingq ndaejnyi gij sing raemx dah gwnz mbwn lae, lij ndaejnyi gij sing bouxsien daemjrok. Miz mbangj lwgnyez manz caen comz gvaqbae dingq, cij dingq ndaejnyi mbaw makit yiengjsasa, caen lumj gij sing daemjrok, youh lumj miz vunz sing iq gangj naeuz: “Moix bi doxcomz ngamq mbat ndeu, dinj lai lo, hoeng cijaeu ndaw sim miz giuz, ngoenzngoenz cungj dwg caet nyied cocaet.”