Mboengqneix, Cunghyangh Minzcuz Dayoz Cungguek Siujsoq Minzcuz Yijyenz Vwnzyoz Yozyen cujciz vunz daengz Ningzmingz Yen guh Guekgya Minzveij minzcuz yenzgiu hanghmoeg “diucaz yenzgiu gij vahgangj henzguek Denh Gvei sawjyungh cingzgvang”, doeng- gvaq daengz dieg diucaz yenzgiu cam ra gij vahgangj dieg henzguek yungh ndaej baenzlawz yiengh, vih baujhoh caeuq cienzciep vahgangj daezhawj soqgawq cengjdaemx.

Diuyenzcuj gonqlaeng youq Ningzmingz Yen Aiden Cin Ganh’ai Cunh、Cwngzcungh Cin Gveizdangz Cunh guh diuyenz, caeuq vunzmbanj nienzgeij、minzcuz、singqbied、ciknieb mbouj doengz gangjgoj. Youq mwh diuyenz, diuyenzcuj hopheux vahgangj yungh lainoix、 gangj daih caeuq daih cienzciep mbouj doengz、 vahgangj baujhoh aeuyungh doengh gij vwndiz neix, caeuq vunzmbanj gangjgoj, soucomz gij soq dangdieg Vahcuengh、Vahyauz、Vahhek doengh gij vahgangj neix youq ngoenznaengz gangj、ndawranz cienzciep、ndawbiengz yungh daengj yungh lai yungh noix.

Ciuq cam rox, baez diuyenz neix cujyau cimdoiq gij vahgangj dieg henzguek raeuz yungh ndaej baenzlawz guh diucaz caeuq yenzgiu, Ningzmingz Yen miz gij vahgangj vwnzva swhyenz caeuq minzcuz vwnzva swhyenz fungfouq, gak minzcuz yungh lai cungj vah yienh’ok gak minzcuz lai doxbyaij doxgyau doxyungz. Doenggvaq diuyenz, cingjleix gij cingzgvang seizneix caeuq fazcanj hojcawq vahgangj dieg henzguek, vih ceiqdingh gij cwngcwz baujhoh vahgangj gohyoz、doidoengh gij conzdungj vwnzva maenhndei Cunghvaz Minzcuz cienzciep cauhmoq daezhawj gezcwz canhgauj.

(Liengz Yijcingz、Liengz Funghgoz)