Ciuq Gvangjsih Haeujok Gyaiq Benhfangz Cungjcan suenq, 7 nyied 1 hauh daengz 8 nyied 22 hauh duenh gyajseizhwngq, daengx gih gungh niemhcuengq bouxhek haeujok gyaiq mauhgvaq 200 fanh vunzbaez, doengzbeij lai hwnj 17.8%, hamj gyaiq baeyouz laebdaeb lai hoenghhwdhwd.

Bi doxgyau yinzvwnz Cungguek Yeznanz gikhoengh hamj gyaiq baeyouz hoenghhwd. Youq Dieg Doxgap Hamj Gyaiq Baeyouz Raemxdiuqdat Dwzdenh(Banjyoz) Cungguek Yeznanz, Sozlungz Benhgenjcan doenggvaq “mienx aeu raizfwngz、mienx gaepyaenq、mienx dienz mbawgaj vunz guekrog haeuj gyaiq” caeuq gwnzsienq caez saemj doengh gij banhfap fuengbienh neix, hawj bouxhek haeujok gyaiq gvaq ndaej doengrat, dieg doxgap soq bouxhek doengzbeij lai hwnj 17.4%. gij cwngcwz lai fuengbienh ciemcingq caemhyamq doihaeuj lai hawj vunz ndaej leih, Nanzningz Goujan dangguh dieg youqgaenj hangzgungh najdoiq Dunghmungz, gyajseizhwngq bouxhek haeuj gyaiq caemh hwnj lai, gyoebsuenq ciepdaih bouxhek 3.53 fanh vunzbaez, baujcang hangzbanh yinhhek 362 gyaqbaez.

Goujan lohhawq youqgaenj raeb hek ceiq lai. Youjyizgvanh Goujan soq bouxhek haeujok gyaiq daengz 37.3 fanh vunzbaez, doengzbeij lai hwnj 30%. Bouxhek gyalai, benhgenjcan cauhmoq doihengz yiengh yawhbauq yawhgenj lijhingzse, caemhcaiq seizseiz diuzboiq cazniemh roenloh, baujmaenh ndaej gvaqgvan vaiq. Dunghhingh Goujan guh ndaej engq yienhda, gyoebsuenq niemhcuengq bouxhek 132.4 fanh vunzbaez. Doenggvaq lai baij gingjcaz、guhndei bouhloh, Dunghhingh Benhgenjcan gvaqgvan ndaej vaiq gvaq lailai.

Muengx roenloh hwnjmbaek gyahaeuj rengz moq hawj hamj guek baeyouz. 7 nyied 1 hauh hainduj, Dunghhingh haidoeng gaudiet cigsoh daengz Gveicouh、Swconh、Sanjsih、Gvangjdungh doengh gij dieg neix, lai hawj bouxhek haeuj gyaiq “youz Cungguek ngoenz ndeu” ndaej bae gyae di. Gvaqgvan vaiq caeuq gvaqgvan swnh dox boiqhab guh, hawj bouxhek ndaw guek rog guek ndaej lai raen yienghsiengq lai yiengh Cungguek. （daj 《Gvangjsih Yizbau》 aeu Lij Yenz Dwng Cunghyau）