Dwg Cinz lauxbanj dwk daeuj, Cinz lauxbanj naeuz banringz it diemj cung caeuq Vangz Gencingh bae Bwzhaij yawj dieghong moq.

Bouqhaeux moq, Lungzingh cam Lij Danenz:“Lauxdoengz, seizneix hawj gij cienz nizswjfwnj hawj gou lo.” Lij Danenz aenvih yungh gij nizswjfwnj yaez caengj cuij daengz yamq neix, de nyaenxheiq naeuz:“Doengz ha, mwngz gaej naeuz lo……” Lungzingh naeuz:“Ngaenzcanh gou mbouj aeu mwngz, ngaenzgoek mwngz ceiqsiuj hawj gou ba.” Lij Danenz ndaq naeuz:“Gou mbouj heuh mwngz boiz ngaenz sonjsaet couh suenq ndei lo, mwngz dauqfanj laeh gou hawj ngaenzgoek mwngz, miz dauhleix mbouj?” Lungzingh doq fatheiq naeuz:“Ndaek ngoengqngwt mwngz neix mbouj gangj dauhleix!” Lij Danenz engq hozndat:“Lwgndai neix mwngz simdaeuz ceiq naeuh, cauh huqyaez haih vunz!” Lungzingh lwgfwngz vix Lij Danenz, “mwngz uk haeuj raemx gvaq, gij nizswjfwnj gou gai song bi lai lo, mbouj miz byawz naeuz gvaq, caemhcaiq haenx dwg gou langhdangh si hawj mwngz!” Lij Danenz da’myonz naeuz:“Mwngz simdoeg simbwn, cienmonz cauh huqgyaj yaeuh vunz cienzcaiz, gou caengh mbouj catsaij hawj mwngz!” Lungzingh hujdengdeng:“Ndaek gyaeujmoegloih mwngz neix ha, ngoenzlawz deng ci saeg dai bae cix hab’eiq lo!”

Lij Danenz hozndat dwk najbyak hwnj “feiz”, doq ndwn hwnjdaeuj song fwngz gaem ga congz boekfan aen congzhaeux, cij ndaejnyi “biba” “banglang”, gij sing vanj、cenj、bingz doek gwnz namh gingdoengh vunzlai, gyoengqvunz gwn haeux cungj daengx roengzdaeuj yawj dwg gijmaz saeh. “Song lauxdoengz gwn haeux doxceng lo ni.” Daiz henzgyawj seiq boux vunz gwn haeux haenx miz boux vunzmbwk hajcib bi ndeu naeuz.

Vangz Gencingh naengh youq gwnz daengq gunghgyauh cehcan, caeuq Cinz lauxbanj gangj vah, cib faen cung baedauq. Dwk liux Vangz Gencingh ndaep denva byaij dauq bouqhaeux, daj gyae yawjraen song lauxdoengz mwngz vix gou gou vix mwngz lumj song duz vaizdaeg yaek doxdaemj, youh raen Lij Danenz boek congzhaeux, neix baenzlawz baenz! Danghnaeuz gou gvaqbae, coengh bouxlawz ni, gauj mbouj ndei deng vanj vaih roxnaeuz bingz vaih gveng dawz gyaeuj naj dem, mbouj dai hix sieng, gou gwnvi hung lo, gou aeu daiq beixnuengx song mbanj bae Bwzhaij guhhong! Siengj daengz neix, de cienj ndang deuz bae, deq aen cigunghgyauh hai daeuj de doq saet hwnj ci buet lo.

Bouqhaeux moq gij vunz gwn haeux ngeixlwnh foenxfoenx, lauxbanj byaij gvaqdaeuj cam:“Song vunz sou miz gijmaz saeh yienghneix youqgaenj boek congzhaeux bae?”（36）