Yaek daengz haihag lo.

Cangh suhgi youq aen ginzveizsin ndaw mbanj fat dunghcih iucingj vunzmbanj bae laeng de gwn hoihlaeuj swnghag daeglwg de, vanzlij mingzmingz begbeg gangj le iugouz naeuz fungbauq mbouj ndaej daemq gvaq sam bak maenz.

Iucingj dunghcih baez fat okdaeuj le, ndaw mbanj couh lumj cauq(rek) raemxgoenj nei goenj- foedfoed hwnjdaeuj lo, vunzlai youq baihlaeng lwnhnyaengnyaeng naeuz goeng neix siengj guh gijmaz saeh ha? Siengj aeu ngaenz siengj ndaej fatbag lo, baihgwnz mbouj dwg gvidingh la, seizneix ganbu beksingq aeu bawx haq lwg roxnaeuz miz begsaeh mbouj ndaej cingj laeuj hung rib ngaenz, de mbouj cuengq haeuj rwz bae, lij dingj rumz guh saeh dem, nanzdauh de mbouj lau dai ha?

Cangh Wgouj dwg boux mbouj gangj dauhleix ndaw mbanj ndeu, baeznaengz raen vunz guh maz saeh cizgiz de gyaez fanjdung, daegbied dwg baezneix, de youq ndaw sim swhgeij gag naemj Cangh suhgi siengj aeu hoihlaeuj swnghag aen gihvei neix daeuj rib ngaenz aeu cienz, mwngz couh yaek raen duzfangz meh mwngz lo, aeu mbouj rox gaeuq rox doh nauq, caj daengz seiz mwngz cingj laeuj haenx, gou haengjdingh yungh soujgih ingj geij mbaw siengq caeuq ingj geij aen yienhciengz sibinz roengzdaeuj, yienzhaeuh yiengq baihgwnz fanjyingj, vih vunzlai ok gaemz heiq ndeu. Hw, ngamq ndaej dang di dangjcihsuh ndaw mbanj couh baenzneix iuseiq lo, boux ndaej dang guenhung haenx baenzlawz naeuz mbouj damcaiz lai ni?

Daengz ngoenz hoihlaeuj swnghag haenx, bae daengz laeng Cangh suhgi, cij raen ndaw gyangluengq de baij miz haj aen daizbyaek, moix aen daiz gwnzde cij baij miz di nohgaeq nohmou caeuq di byaekheu ndeu, gyoeb hwnjdaeuj mbouj dij daengz bak lai maenz ngaenz, Cangh Wgouj youq ndaw dungx gag ngeix, gou naeuz mbouj loek ba, caendwg deng dahraix lo, cungj vunz neix mbouj dwg haimingz rib ngaenz dwg gijmaz dem? Byawz raen gvaq cingj laeuj guh ndaej baenzneix maetmi ha? Lij iugouz naeuz fungbauq ceiq noix aeu hawj sam bak maenz dem. Caendwg dwgcaengz(saetnaj) beixnuengx vunzlai lai lo. Hoeng Cangh suhgi song gvanbaz lij gig yiedcingz daeuj ciudaih vunzlai, cijraen gyoengqde youh fat ien hawj vunzlai youh heuh vunzlai naengh roengzdaeuj dem.

Caj vunzlai ca mbouj geijlai yaek daengz caez lo, Cangh suhgi ndingq boux boi caz ndenq hawj vunzlai le gingz boiq hwnjdaeuj doi vunzlai naeuz:“Ngoenzneix doiq mbouj gvaq daihgya lo, ngoenzneix cingj daihgya daeuj mbouj dwg vih daeglwg gou guh hoihlaeuj swnghag, gou cij cinjbi le di byaek genjgenj danhdanh neix hawj daihgya guhdoih naengh roengzdaeuj gangjgangj goj, hixdwg siengj ciq aen gihvei neix hawj daeglwg Cangh Youjfu ndaw mbanj raeuz gien di ngaenz he, caemhcaiq guh aen yizsiz angqsoengq genjdanh ndeu.”

Dingqnyi Cangh suhgi yienghneix gangj le, mwhhaenx daihgya ndwn youq gizhaenx, hix fwt singj gvaqdaeuj, mbouj rox gangj gijmaz ndei.

Cangh Youjfu, dwg boux gwnz ranz haemq gungzhoj Mbanj- canghgyah ndeu, bingzciengz de guh vunz lauxsaed goq ranz, gaenxgiemh mbaetyungh, guhhong mbouj in rengz, bingzciengz ndaw mbanj laeng byawz miz gijmaz gunnanz sihyau bangcoh de ndaej bang couh caenhliengh bae bang, lij mbouj aeu saek di doxgaiq. Lumjbaenz de ciengz bae bang bouxlaux ndaw mbanj coih ranz vaih、 dawzrauq, bang bouxgeq bag fwnz, cungqvunz cungj haenh de simndei, gijneix, ndaw mbanj bouxboux cungj rox.

Gwnz naj Cangh suhgi riunyumj laebdaeb ciep roengzbae gangj naeuz:“Bineix daeglwg Cangh Youjfu Cangh Mingz gauj ndaej hwnj Cinghvaz Dayoz lo, dwg aen mbanj rungh raeuz neix boux daih’it gauj ndaej hwnj Cinghvaz Dayoz, mboujdanh hawj ndaw mbanj bouxrungh raeuz, ndaw yanghcin raeuz miznaj, lij dwg ndaw yienh boux gauhgauj canghyienz dem bw. Daihgya cungj rox, Cangh Youjfu dwg ndaw mbanj raeuz boux vunzndei boux vunz lauxsaed ndeu, bi’gyai de vih ndaw mbanj coih lohbya guh mboqraemx okrengz seiz boihseiz deng rin gwnz dat lak roengzdaeuj nap deng ga raek bae， bienqbaenz ndangcanz lo, mehyah de bingzciengz hix dwg ndangdaej mbouj ndei geijlai, guh mbouj ndaej hong naek, daeglwg de bineix gauj ndaej hwnj aen daihhag baenzneix ndei, hoeng seizneix cienzhag dauq bienqbaenz aen vwndiz hung ndeu baij youq dangqnaj de. Ndigah ngoenzneix, gou caensim cingj daihgya daeuj bangbang de, sou naeuz habbouh mbouj hab?”

Mwhneix, daihgya cungj dingq rox saehcingz baedauq lo, youq laj doq bekfwngz gyukroebroeb hwnjdaeuj, biujmingz doengzeiq.

Mehyah Cangh suhgi youq bangxhenz dawz bonj bitgeiq ndeu caeuq gonj bit ndeu okdaeuj, baenz ranz daenggeiq, ranz byawz gien geijlai ngaenz, daihgya mwngz gien sam bak, gou gien haj bak, yaep ndeu couh gien ndaej song fanh lai maenz ngaenz.

Cangh Wgouj yawjraen daihgya gien ngaenz guh dwk nyaengq- byaengbyaeng, seizneix de najnding lo, rwzhwngq fwbfwb bae, ndawsim gig mbouj eiqsei, de byaij gvaqbae daihsing doiq Cangh suhgi naeuz:“Gou caemh gien song cien maenz.”

Aen ciengzmienh gien ngaenz neix, gij sing riu caeuq gij sing gien ngaenz haenx gyonj youq itheij, seizhaenx, daj ndaw gvangjbo ndaw mbanj cienz ok souj go mingzcoh heuhguh 《Maij Fungyen》 daeuj…… Cijaeu bouxboux ndaej gungyen di ndiepgyaez ndeu okdaeuj, gwnz seiqgyaiq neix couh ndaej bienqbaenz ndawbiengz gyaeundei…… Gij singgo ei gehluengq Mbanjcanghgyah, ei geh lueg laeg goxbya mbin ok ndaw rungh bae ndeidingq raixcaix.