Geij bi neix doxdaeuj, Dunghlanz Yen guh’ak dinfwngz、vunzcaiz bae dingjcengj feihyiz vwnzva canjnieb caeuq diuzlienh canjnieb huq bengxgya de, cauhlaeb aen gihci daengx lienhdiuz “ciu son yungh louz” vunzcaiz feihyiz, coengh rengz hung guhhoengh vwnzva lajmbanj.

Dawz cinj meg, cuknet goekdaej vunzcaiz. Dingj aen yenzcwz Dangj guenj vunz, cujciz dangjyenz ganbu bae 14 aen yanghcin guh hong bujcaz feihyiz swhyenz, gyoebsuenq souloeg “gij sibgvenq nyenz Bouxcuengh”“ciet goepgvej Bouxcuengh”“foux gyonglingz Yauzcuz” daengj gak gaep feihyiz hanghmoeg 17 aen, racimh gaep guekgya、gaep swcigih、gaep bonjsi bouxcienzswnj feihyiz 26 boux.

Lai yiengh son’gyauq, gikcoi rengzhoengh cienzswnj. Guh “bohsae faek lwgsae”, cingj bouxcienzswnj feihyiz lauxhangz daeuj guh lauxsae, caeuq bouxcoz gapdoih son dinfwngz. Seizneix, aen yienh neix gaep guekgya bouxcienzswnj feihyiz Veiz Vanyi son 6 boux lwgsae ndawde, gaenq miz 2 boux ndaej gag guh aen yizsiz caeqbaiq youqgaenj roq gyong roq laz. Doihaeuj feihyiz vwnzva haeuj hagdangz、haeuj segih、haeuj gingjgih, youq aen yienh neix Cizyez Cunghyoz laebmiz “aen ban cienzswnj dinfwngz minzcuz”, youq cungh siuj hagdangz laebmiz aen sedonz yinx feihyiz, gingjgih baeyouz guh diengzhong feihyiz hawj vunz sawq guh. Gaenh 3 bi neix doxdaeuj, daengx yienh guh cienz hag son’gyauq 200 lai ciengz- baez, ndei daengz bouxcoz nyezrauh ca mbouj lai baenz fanh boux.

Vwnzlij yungzhab, cuengq- soeng rengz canjnieb. Cauhmoq aen vunq hwngfat doxyungz “dangjgen+feihyiz+baeyouz”, hwnqbaenz guenj langhbaij minzcuz vwnzva ciuhgeq、dieggiek cienzswnj、dieg cienz hag doenghgij dieg guh feihyiz vwnzva neix 31 aen, dap daiz hawj bouxcienzswnj dox baedauq. Baengh “gij sibgvenq nyenz Bouxcuengh”“ciet goepgvej Bouxcuengh” daengj feihyiz hanghmoeg gaep guekgya, ciengzseiz guh “ndwenndwen yienj nyenz”、ciet goepgvej daengj yienghsaeh neix, ciuyinx bouxhek daeuj youz sawq. Bineix byonghbigonq, daengx yienh gyoebsuenq guh yienghsaeh vwnzva dijyuz baeyouz 82 ciengz, ndei daengz vunzlai 66 fanh lai vunzbaez, gyoebsuenq ciepdaih bouxhek 203.52 fanh vunzbaez, doengzbeij lai hwnj 1.1%.

(daj 《Hozciz Yizbau》 aeu daeuj genj hoiz Veiz Binjdauz Banh Yinghnaz)