Mboengqneix, Swcigih Gunghyez Caeuq Sinsizva Dingh lwnh vunzlai rox, byonghbigonq, Gvangjsih minzyingz gunghyez giyez coh hoj doxbae, lai ra banhfap bae wngqdoiq baihrog cungdongj gyalai、hawciengz aeuyungh mbouj gaeuq doengh gij mbouj ndei neix, guhbaenz soqdemlai、leihnyinh、roengzgoek lai hwnj riengjret, aen cawjdaej guenjguh lienzdaemh guhhung, aen gapgyaq canjnieb laebdaeb guhndei, yienh’ok rengzhoengh hwngfat hung’ak nyangqnywd.

Ciuq gyoebsuenq, byonghbigonq, daengx gih minzyingz gveihmoz doxhwnj gunghyez soqdemlai doengzbeij lai hwnj 12.9%, sang gvaq daengx gih gveihmoz doxhwnj gunghyez soqdemlai 5.2 aen bakfaendiemj; daengx gih ndawbiengz roengzgoek doengzbeij lai hwnj 8.4%, ndawde, ndawbiengz gunghyez roengzgoek doengzbeij lai hwnj 16.6%, ciemq gunghyez beijlwd roengzgoek 49.4%, lai gvaq bi’gvaq caemhseiz 2.9 aen bakfaendiemj. Giyez leihnyinh lai hwnj riengjret, 1-5 nyied, daengx gih minzyingz gveihmoz doxhwnj gunghyez giyez leihnyinh cungjngeg doengzbeij lai hwnj 58%, hwnj sang gvaq daengx gih gveihmoz doxhwnj gunghyez giyez 25.4 aen bakfaendiemj, ciemq gveihmoz doxhwnj gunghyez giyez leihnyinh cungjngeg 52.3%, sang gvaq bi’gvaq caemhseiz 8.4 aen bakfaendiemj.

Bineix doxdaeuj, Gvangjsih dungjcouz ngaenzcienz caizcwng haeujcoengh giyez demcanj demndaej、gyavaiq roengzgoek daengj, anbaiz mauhgvaq 25 ik maenz ngaenz- coucienj gunghyez hanghmoeg haeujcoengh gyavaiq cwngcek、bingzcingj diegnamh daengj hong baihgonq hanghmoeg, yungh lai cungj banhfap bangrengz giyez gyangqgoek demndaej, bi 2025 dienh gaicawx gyaqcienz doengzbeij roengz 23.8%.

（daj Yinzminzvangj aeu daeuj genj hoiz Liengz Cinghvei）