（ciep daih 3674 geiz）

Vangz Gencingh gwn cenj caz daihsam, yawj gvaq daihroen doiqnaj bae, raen boux vunz ndeu yienghceij gig lumj Lij Danenz, yamqdin hix lumj, daenj mauhbakbit, ngengq ndang yawj mbouj rox. “Boux vunz haenx byaijroen lumj lauxdoengz Lij Danenz lwi?” Vangz Gencingh cam.Lungzingh yawj gvaqbae naeuz:“Lumj lumj, mwngz buet gvaqbae nep di yawj baez.”

Vangz Gencingh doq cuengq cenj buet gvaq daihroen bae, “Lauxdoengz!” Vangz Gencingh buet youq baihnaj yawj caendwg Lij Danenz, Lij Danenz loq doeksaet, mizdi najyed, Vangz Gencingh doq naeuz:“Lauxdoengz, bae gwn haeux!”

Lij Danenz siengj mbouj bae, Vangz Gencingh ngaej naeuz: “Doengz ha doengz, nanz mbouj raennaj, gou ndawsim gig gvaqniemh mwngz ha!” Doq gangj doq rag fwngz Lij Danenz gvaq daihroen daeuj daengz bouqhaeux. Yawjraen Lungzingh, Lij Danenz dangq yawj gong haexvaiz ndeu, Lungzingh raen le Lij Danenz, sim naemj song fanh maenz ngaenz nizswjfwnj miz muengh lo. Vangz Gencingh heuh Lij Danenz naengh daengq, caem caz hawj de, youh heuh boux hauxseng fugsaeh nyaengq haenx gvaqdaeuj diemjbyaek. Song ndwen lai mbouj raennaj, Lij Danenz naj byom haujlai, buhvaq gaenq miz lai ngoenz mbouj rieg lo, gij funghdu ngoenznaengz deng mauhbakbit goemq caez.

Byaek daeuj lo, song vanj nohcing cauj raet, vanj nohhanq ndeu, vanj nohcwz ndeu, bingz laeujmauzdaiz ndeu. Vangz Gencingh hai fabingz sai sam cenj laeuj song fwngz ndenq hawj song lauxdoengz, angq naeuz: “Ngoenzneix sam lauxdoengz raeuz ndaej youq neix raennaj, gou gingq song lauxdoengz cenj ndeu.” Sam lauxdoengz ndwn hwnjdaeuj bungqcenj, “Ndei, naengh roengzdaeuj menhmenh gwn haeux.” Vangz Gencingh naeuz, gij caensim saed’eiq fouzfap gangjok.

Lungzingh myaeg yawj Lij Danenz, lumj gig gyaez gwn nei, geij faen cung couh gwn caez vanj haeux ndeu, vanj nohcing cauj raet haenx gwn bae dingz ndeu. Lungzingh sim naemj, ndaek mwnh neix iek dai le, geij ngoenz mbouj ndaej gwn haeux lo. Vangz Gencingh heuh nip noh- hanq, seizbienh di, gaej guhhek.

Seizneix denva Vangz Gencingh yiengj le, de doiq song lauxdoengz naeuz: “Song lauxdoengz menhmenh gwn, gou bae ciep denva beixnuengx gonq.”（35）