Daengngoenz banhaemh ciuq dwk ngaeuz goreiz raezrangrang, ngamq cuengqroengz aen daehsaw nyib rim ciuqfong haenx, gou couh rag Daegcaet yiengq henz mieng buet bae——Bae ven byanouq.

Mbawgyoij henz mieng deng rumz baez ci, yiengjcaca, hwk dwk gyoengq gaeqlwg youq laj ledcuk heuh “cici” dauqcawq luenh buet. Daeghingh caeux maeuq youq henz mieng, de vid gavaq uq rim faenx faenjbit haenx daengz gyaeujhoq, song fwngz gaem aen buenzluengz bakvengq lij miz haeux nyaq banhaet nem baihgwnz dem.

Bungz daengz ndaw mieng raemx lai, dou couh baenz boux “canghsuijli” iqetet. Daeghingh ra geij gaiq benjfaex vaih daeuj, Daegcaet buen geij gaiq rinhung daeuj, gou cix aeu daehbaengzlamz daeuj coux rinsoiq. Dou aeu doenghgij doxgaiq neix saek youq gizgaeb diuzmieng, din fwngz caez yungh dwk caep baenz diuz fai daemq ndeu. Yawj gij raemx menhmenh doekdaemq, sim gou angq dangqmaz, lumjdwg gaenq yawjraen duz byanouq bizbwd youq ndaw boengz con bae con dauq, couh caj gou bae sou lo.

Caj raemx gonh ndaej ca mbouj geijlai le, heiq ndeiyawj cij caencingq ngamq hainduj. Gou maeuq roengzbae, fwngz yaeng’yaeng damq roengz raemxhoemz bae, byaifwngz bungq daengz gij boengz daejmieng unqnemnem, fwt roxnyinh byaifwngz liengzsisi. Swnh aen bop lumj naed duhhenj hung gwnz raemx, gou aeu fwngzmeh caeuq fwngzyinx siujsim riri dwk bued deuz caengz namhboengz baihgwnz, naezngawh lumj dangzgyaujgwzliz nei yungz le daj heq lwgfwngz menhmenh vadraeuz doekroengz. “Mbatneix haengjdingh miz!” Gou youq ndawsim nam dwk, cehda gaenjgaenj cimyawj mienhraemx, dujrwz caemhcaiq dingq ndaej nyi sing “bubbub” simdiuq bonjfaenh.

Fwt, byaifwngz gou bungq daengz gaiq doxgaiq doedhwnj raeuzredred ndeu, sim baez saenz, lumj deng lwgnyauj nyauj mbat ndeu nei. Gou daengx cik fwngz haem roengz gumzboengz seiz, angjfwngz bungq daengz duenz nemnwdnwd ndeu, “Dwg byanouq! Caen dwg byanouq!” Gou cadi heuh ok sing daeuj, ndawsim angq raixcaix. Seiz duz byanouq lumj diuzbien cat gvaq youz nei niujfedfed, gou youh doeksaet youh sim’angq, song fwngz sikhaek gyoeb hwnjdaeuj, namhboengz swnh heq lwgfwngz “bugbug” ndik roengz, yawj duz byanouq diuqyetyet neix youq angjfwngz haenqrengz cak dwk, cungj fungsou neix doenghbaez caengz miz gvaq, sim’angq raixcaix, couh lumj seizcou got dwk haeux caemrikrik nei, nyaenx mbouj ndaej sing hung doiq doengzdoih hemq: “Gou youh ven ndaej lo!”

Geh ven byanouq, cungj mienx mbouj ndaej aeu naezboengz doxhoenx. Daegcaet swnh gou mbouj haeujsim, rax gaem boengz ndeu hwnjdaeuj couh dub laeng ndang gou, “bub” sing ndeu, naezboengz sinz daengz laeng hoz gou, liengzswbswb. Gou sikhaek dauqhoenx doxbae, gyaeb dwk de youq ndaw mieng luenh buet, singriu hwk mbin le biengzbeih gwnz gofob. Daegvuengh youq henz riu dwk hwet gungj bae, gou caeuq Daegcaet doxyawj da ndeu, mbouj gangj vah cix doengzseiz itheij fwt hoenx de, gaemh de roengz boengz bae, yawj de daengx naj nem rim boengzndaem, cij loh song baiz heujhau, dou riu dwk dungx cungj in liux.

Seiz daengngoenz banhaemh ciuq dwk dujfwj lumj makdoengj nei, dou cij caij dwk muenx dieg rongh fwjhaemh bae ranz. Gyae’gyae couh muenghraen daxmeh ndwn youq henz ledcuk, fwngz gaemdawz sauqbaet, nyouj dwk najbyak. Gou ndawsim miz di lau, hoeng yawjraen byanouq ndaw buenzluengz nyeq baenz duenz, riengbya bek dwk aenbuenz “baba” yiengj, youh nyaenx mbouj ndaej caegcaeg sim’angq——Neix dwg gij “cwngzgoj fungsou” dou, haemhneix haengjdingh miz byanouq cien gwn.

Doenghgij roencuengqhag nem dwk naezboengz caeuq ngoenzsinghgiz cimq dwk raemxraiz banhaet, lumj byanouq daej mieng vad haeuj ndaw uk laeglumx bae. Seizneix moix baez nyouq daengz gij heiqhom nywjraemx gap dwk heiqsing naezboengz, henz rwz lumjnaeuz youh dingqnyi gij singriu byot dou caeuq gij sing cakdoengh byanouq nei, lijmiz gij angq fungsou rimdungx haenx.