8 nyied 1 hauh, Swcigih Dangjveij suhgi、Swcigih Yinzda Cangzveijvei cujyin Cinz Gangh bae Gveigangj Si Gangjnanz Gih、Gangjbwz Gih、Cinzdangz Gih, diuyenz canjnieb hwngfat、swnghdai vanzbauj、guhhoengh lajmbanj.

Cinz Gangh daeuj daengz Gvangjsih Bozyidwz Cinwngz Gyahgih Canjyezyenz hanghmoeg、Aimaj Civei Cuzhingz Canjyezyenz hanghmoeg、Gvangjsih Yinhnozswng Yauyez Youjhan Gunghswh、Gveigangj Lungzbai Sizyez Cizdonz Youjhan Gunghswh, dingq Dieg Haifat Ginghci Gveigangj Rangh Ginghci Dahyinh Bingzluz caeuq muzyez、canjnieb dienhdoenghci nwngzyenz moq、yihyoz、ceijnieb daihneix bauqlwnh hwngfat cingzgvang, byaij haeuj aending langhbaij giyez caeuq swnghcanj cehgen, caeuq bouxfucwz giyez gangjgoj, ciengzsaeq roxyiuj giyez swnghcanj guenjguh、yenzgiu haifat canjbinj、 hwnqguh binjbaiz doengh gij cingzgvang neix. Cinz Gangh naeuz, giyez aeu gyalai rengz gunggvan gohyoz yenzgiu, lai yungh yinzgungh cinwngz hawjrengz、gemjgoek、demndaej, laebdaeb hawj huq lai dij cienz caeuq giyez lai ak lai ndei, youq mwh bangrengz deihfueng hwngfat ndei saed guhbaenz ndanggaeuq hwngfat engq ndei.

Gvangjsih Yangzsiengz Cizdonz Gujfwn Youjhan Gunghswh dwg aen giyez lingxdaeuz youqgaenj guekgya canjyezva nungzyez、giyez guhhoengh cungjyez guekgya. Cinz Gangh daeuj daengz aen gunghswh neix ciengzsaeq roxyiuj cinwngzva ciengx mou daengx diuzlienh canjnieb hwngfat、fuengzceih dajciengx uqlah daengj cingzgvang, gig haengjdingh giyez yawjnaek gohgi hawjrengz、lienz nungz daiq nungz coi nungz caeuq soudauq yungh gaiq huqfeiq dajciengx, maqmuengh Yangzsiengz Cizdonz laebdaeb guh ndei giyez lingxdaeuz, yiemzgek doekguh gij iugouz fuengzceih ciengx mou uqlah, lai damqra dajcauh AI+ nungzcangz daengz gwnz congz daengx diuzlienh canjnieb, daiqdoengh engqlai boux- guhnaz lai miz ngaenz roengz daeh.

Gangjnanz Gih Sinhdangz Cin Sanhbenh Cunh gyaak dangjgen dazyinx, cauhmoq aen vunq ceihleix lajmbanj, gonqlaeng ndaej “aen dangjcujciz gihcwngz senhcin daengx guek”“aen mbanj youqndwi gyaeundei Cungguek” daengj mingzdaeuz. Cinz Gangh daeuj daengz Sanhbenh Cunh Mbanjcaujbingz, byaij haeuj aending vunzlai yaengsaeh、aenguenj langhbaij minzcuz doxgiet、dieggiek cigboq densangh “sam nungz” daengj, nyinhcaen dingq lwnh cingzgvang, ciengzsaeq roxyiuj ceihleix lajmbanj、minzcuz doxgiet caeuq nungzvwnzlij yungzhab hwngfat cingzgvang, haengjdingh gij cingzcik dangdieg yungh ndei bouxak baenzmiz、doihaeuj guhhoengh lajmbanj liuxliux. Cinz Gangh daegbied gangj daengz, aenmbanj aeu baenaj, daih’it aeu miz bouxdaiqdaeuz ndei、aen banhswj ndei、aen lohnaemj hwngfat ndei、giekdaej vunzlai ndei、gij heiqfaenh guhsaeh cauhnieb ndei ndeu. Maqmuengh Sanhbenh Cunh yungh ndei gij conzdungj ndei, hwnq aenmbanj engq ndei bae, hawj gyoengq beixnuengx gvaq ngoenz lai vuenyungz. Guhhoengh lajmbanj aeu dingjmaenh dangjgen dazyinx, giethab couqmaenh gij eiqsik Cunghvaz Minzcuz ranz vunz ndeu, ciuq saed dingh geiq guh canjnieb miz daegsaek hawj bouxminz baenzmiz, doinyoengx nungzvwnzlij yungzhab hwngfat, haenqrengz guh baeyouz lajmbanj, gyavaiq hwnqguh aenmbanj ndeiyouq habhong doxngamj.

Cinz Gangh daegbied gangj daengz, Gveigangj Si bineix byonghbigonq ginghci hwngfat guhbaenz “sueng gvaq buenq”, baujmaenh laebdaeb yiengh dauq hwnj coh ndei, baenz haenh. Aeu lai doekguh gij iugouz youqgaenj Siz Ginbingz cungjsuhgi lwnhgangj hong Gvangjsih, ciuq Aen Hoih Baez Ngeihcib Gaiq Cibngeih Swcigih Dangjveij caeuq Aen Hoih Hong Gyangbi Daengx Gih Nem Aen Hoih Diuhdoh Hwngfat Ginghci Geiqdoh Sam baijbouh anbaiz, hopheux dungjcouz guh ndei cwngci swnghdai、swhyenz swnghdai “song aen swnghdai”, dingjmaenh guhcaen guh daeuz, cauhmoq guh hoen, aeu cingzcik daeuj gangj, hawj bouxminz bingz, lai doengh hwnjdaeuj、gyonj hwnjdaeuj、yiemz hwnjdaeuj、beij hwnjdaeuj, lai yungh ndei dieg youqgaenj diuzsienq Yez Gangj Au Davanhgih——Dunghmungz sangh- mou vuzliuz、gijndei dieg youqgaenj ranghdieg ginghci Dahyinh Bingzluz ciep Cuhgyangh——ranghdieg ginghci Sihgyangh, dungjcouz doinyoengx hawsingz hwngfat caeuq guhhoengh lajmbanj liuxliux, lai gungganq dieg demmaj moq ginghci caeuq doenghnaengz moq hwngfat, aeu yiengh ceiq ak bae guh ndei hong ginghci geiqdoh sam, haenqrengz guh baenz gak gaiq hongsaeh daengx bi ginghci sevei hwngfat aeu guh.

(daj 《Gvangjsih Yizbau》 aeu daeuj genj hoiz Loz Canghlieng)