“Dauqma la！ Vaiqvaiq, gwn caeuz la!”Daxmeh doq yungh dox uet fwngz, doq hemq daihgya gwn caeuz.

Seizneix, mbwn laep lo, gou cuengq roengz daehsaw. Youq ndaw ronghdaeng raeujrub, daihgya homh naengh youq henz daiz.

Daxda daj ndaw ranzdajcawj dawz deb byaek doeksat okdaeuj: Dangbyacaek. Heiqhom dangbya sanq hai, biu rim ndaw ranz, fwi ndat youq ndaw vanj swngngeungeu, heiq hom hopheux youq henz ndaeng.

“Daeuj, gwn dangbya lo.”Daxmeh daek moix boux byongh vanj dang:“Vaiq, daihgya gwn dang ndat, dang ndat cij ndeigwn.”Dou dawz hwnj dangbya ndat, doq siujsim sisi boq heiq, doq menhmenh ndoet. Gij dang youh raeuj youh feih, ginggvaq conghhoz, cig daengz ndaw dungx, ndaw dungx raeujfwd, hawj gij heiq ndit ndaw ndang cungj sanq liux, seizneix, raq raeuj ndeu nyoengx daengz daengx aenndang, hawj vunz muenxcuk simnet.

Daxmeh cuengq vanj roengz, simgip cam:“Feihdauh baenzlawz yiengh? Gou youq gwnz sibinz soujgih hag, banringz couh hainduj ngauz lo……”

“Daxmeh, dang neix feihdauh sien lai lo, dinfwngz dajcawj mwngz youh daezsang lo.”Gou sing hung danq.

“Sien dahraix!” Daxdaiq riengz bak naeuz.

“Gou yawj dahlwg raeuz ngauz dangbya lij ndeigwn gvaq diemqgwnhaeux baihrog gai haenx bw!”Daxda ndoet gaemz laeujhau ndeu gangj, caemhcaiq daengj lwgfwngzmeh haenh.

Daxmeh yawj yienghneix, najnyaenq gangj:“Daihgya haengj couh baenz!”

Daxda youh ndoet gaemz laeujhau ndeu, song gemj gaenq loq hoengz, ciep gangj:“Siengjsiengj cib lai bi gaxgonq, raeuz dwk ndaej bya byawz sij ndaej gwn ha, cungj dwg cuengq roengz ndaw daemz baihnaj ranznamh bae ciengx, daengz ngoenz bae haw, caiq dwk bya roengz rieng le, naengh ruz dawz bae doiqnaj hamq gai……”

“Hoeng seizneix fuengbienh lai lo, cauhsi lajlaeuz gijmaz cungj miz.”Daxda riuriu, riengzlaeng nip gaiq gauva’gveiq ndeu dwk haeuj bak.

“Mbouj gangj lo, mbouj gangj lo, gij gauva- gveiq neix caen diemz, daihgya gwn, cungj gwn!”

“Haenx gou hix daeuj gangjgangj!”Gwn gaiq gauva’gveiq ndeu le gou gangj.

“Daj hwnj le cuhcungh, nyinhrox caeuq siujyoz cix mbouj ityiengh lo！ Seiz hwnj siujyoz, seizgan couh lumj gij raemx ndaw haijmenz, nyaenjnyaenj couh miz, hoeng daengz le cuhcungh couh mbouj ityiengh lo, seizgan gvaq ndaej vaiqvet, nyinhrox baenzlawz mbaet cungj mbouj gaeuq yungh.”Gou doq nip byaek doq gangj, gwn haeux cix gagbaenz gwn vaiqvit.

“Daxda, gou gig siengjngeix doengh ngoenz seiz lij iq caeuq mwngz langh yiengz haenx……” Gou cuengq vanj haeux roengz, swnh fwngz dawz gaiq gauva’gveiq ndeu, “mbouj gangj lo, gou yaek bae sij cozyez lo, sou menhmenh gwn.”

Youq ndaw ranzsaw sij cozyez, sing raemx lae swiq vanj biu daengz henz rwz.

Gou nyaenx mbouj ndaej damz: Seizgan mbin bae, ndwenngoenz louz mbouj youq ha! Seizneix, gyoengqvunz baenzngoenz nyaengq hagsib、guhhong, cij ndaej youq henz daiz gwnhaeux cej geij coenz, gyaulouz mbat gamjcingz ndeu, yungh daeuj nai gij dwgrengz swhgeij. Raeuz gvaq ndwenngoenz, gij maqmuengh cungj youq mwh gwn caeuz ndatfwdfwd neix ha!

(Don Sizyauz raiz / Lingz Hinghningz hoiz)