（ciep geiz gonq）

Miz ngoenz ndeu, baenz ngoenz cungj mbouj raen ngaeuz duzmeuzhau, daengz banhaemh cij raen duzmeuzhau daejfwtfwt daeuj ra de:“Go’ndaem, gou ngaiz bouxcawj dawz bae iem, seizneix ndang gaenq canz lo. ”

“A! Mwngz guh loek gijmaz saeh hawj bouxcawj baenzneix fad mwngz ha?”Duzmeuzhau han sing daemqdetdet:“Gou rox guh loek gijmaz? Yaek gangj loek, couh dwg cihgeij mingh hoj, seng okdaeuj couh dwg duz hawj vunz guhcaemz. Mbouj lumj sou nei miz bonjsaeh gwn haeux baihrog, rox gaeb nou, bang bouxcawj faen you, mbouj hawj vunz guenj din guenj ga. Gou dwg duz nyex naj vunz riu cij ndaej gwn.”Duzmeuzhau gangj sat, couh vaiqvaiq buet bae gyae lo.

Daj ngoenzhaenx hwnj, duzmeuzhau bienq lo, mbat raen Lwgndaem couh gangjvah samsam seiqseiq, nyex ndaej Lwgndaem naj ndaemfwtfwt. Gizsaed, duzmeuzhau ndawsim gig haemz, de dwg lau bouxwnq rox gij in de, couh lumj ukhaw nei gaeb deng bouxlawz ndaq boux de. Duzmeuzhau ndawsim gag naemj, gou mbouj ndei gvaq, gou hix mbouj hawj sou ndei gvaq.

Haemh ndeu mbwn ngamq laep, Lwgndaem daj baihrog ma ranz, meh de muengz beng de ndoj haeuj aen ranz gox bae.“Meh, ok gijmaz saeh baenzneix vueng?”Lwgndaem roxnyinh geizheih, ukgyaeuj yaep he baenq mbouj gvaqdaeuj.

“Lwg ha, meh gangj cien baez fanh baez mwngz cungj mbouj dingq haeuj rwz. Hozhaenz meuzhau youq ndwi daenj luemj, dam gwn dam liuh, ciengx ndang bizbwtbwt hawj vunz ndiep. Seizneix miz goeng geq naj yak sim doeg he hwnj ranz daeuj ra bouxcawj, yaek guh aen byaek heuhguh raemxdang lungz fungh guk ndeu, couh dwg aeu nohmeuz、nohngwz、nohgaeq itheij aeuq raemxdang. Meh baenzlawz mbouj you mingh mwngz ha?”Lwgndaem dingq le dinfwngz cungj saenz caez, daengz haeux hix mbouj gwn, couh cacoemj bwq bae baihrog, ndoj haeuj goengqbya youh sang youh fwz bae. Bouxcawj ra dai hix ra mbouj raen Lwgndaem, couh mbouj guenj de lo. Lwgndaem youq goengqbya ndaw lueg laeg haenx gag dwknou gwn cengqgengz gvaq ngoenz. Hoeng miz seiz fwn doek mbouj dingz, duznou mbouj okdaeuj, de couh ngaiz iek lo. Lwgndaem mbat ngeix daengz gij vah daxmeh, cungj loq fangzhwnz yak.

Miz haemh he, Lwgndaem siengj meh ninz mbouj ndaek, caegcaeg buet dauq ranz. Ngamq daengz bakdou, de couh bungz deng duz ngwzlaux he cingq ndonj haeuj gehdou bae, danghnaeuz mbouj gaeb roxnaeuz neb duzngwz okbae, bouxcawj couh miz nanh lo. Lwgndaem baez daih’it bungz deng ngwzlaux, aensim de saenzdetdet, dinfwngz hix unq lo, dwglau dangqmaz, hoeng de ngeix daengz bouxcawj gaxgonq ndiep mehlwg de lailai, de caengz ndaej bauqdap, de couh miz rengz lo, de fwt saet hwnjdaeuj, raemhrwd buekmingh gaemhdawz aen gyaeuj duzngwz. Duzngwz laux cak dai, yaek fanj haeb Lwgndaem, Lwgndaem dai hix mbouj soeng bak, songde mwngz gaemh gou cak hoenx ndaej gig haenq. Meh Lwgndaem dingqnyi le, sikhaek buet gvaqdaeuj bang Lwgndaem, mehlwg caezsim gaeb dawz duzngwz laux:“Meh, raeuz dwkhingz lo.” Lwgndaem baeg ndaej doix roengz gwnz namh, hoeng de roxnyinh miznaj dangqmaz. Ngoenz daihngeih, bouxcawj hwnqmbonq raen miz duz ngwzlaux ndeu dai youq henz ranz, de doeksaet yat, cazyawj seiqhenz, couh raen Lwgndaem dauq ranz lo, gwnz ndang lij nem miz haujlai lwed, bouxcawj couh rox dwg Lwgndaem gouq mingh de lo. Bouxcawj gamjdoengh dangqmaz, sikhaek hai ci doz Lwgndaem bae hawj canghyw genjcaz. Canghyw dingq gij goj Lwgndaem sat, hix daengj mehfwngz haenh:“Duzmeuzndaem caen singqlingz, rox bauqaen, ak gvaq bouxvunz uknaeuh bw.”Bouxcawj dingq le naj fwt nding lo, gag daj aen naj cihgeij baba:“Aensim gou caen dwg hawj youz myox lo, dingq vunz yoeg geij coenz couh ienuengj Lwgndaem guh saehvaih, hozndat lij yaek dawz de bae gai dem. Caeklaiq aen mbwn hai da, mboujne Lwgndaem couh dai da mbouj laep lo.”

Lwgndaem sieng ndei dauq ranz mbouj geij nanz, couh yawjraen duzmeuzhau gaxgonq daekeiq haenx cingq ndoj youq henz ranz bakdou daejswtswt, gyaeuj hix mbouj gamj ngiengx.“Mwngz vihmaz daej?”Lwgndaem geizheih cam. Duzmeuzhau han:“Bouxcawj ndaq gou sim mbouj cingq, hawj de ienuengj mwngz, lij yiemz gou mbouj guhhong, hawj de sinhoj guenj, neb gou ok dou lo. Gou mbouj rox gag ra gwn, ngoenzlaeng baenzlawz ciengx mingh ha?”Duzmeuzhau doq gangj doq uet raemxda.“O, mbatneix mwngz hix simvueng la? Mbouj ndaq gou dwg bouxdoj uknaeuh la? Mwngz vaih mingzdaeuz gou, mwngz hab deng fad.”Lwgndaem raen duzmeuzhau doeknanh, de roxnyinh caen biuhhoz.“Go’ndaem, gaxgonq dwg nuengx da mengz, gou ngaiz dawz bae iem bienq canz lo, aensim mbouj ndei gvaq, dawz mwngz daeuj okheiq, dwg gou guh mbouj deng, mwngz bouxvunz laux aek gvangq, gaej dawz haeuj sim lo. Gou lij yaek baengh mwngz son gou goengfou dwknou ciengxbak, gaej yiemz gou bamz bw. Danghnaeuz mwngz mbouj guenj gou, gou diuq dah dai suenq lo.” Duzmeuzhau daej dai daej lix, doekcaw dangqmaz. Lwgndaem dingq duzmeuzhau gangj geij coenz vah ndei, youh hojlienz duzmeuzhau mbouj miz bonjsaeh ra gwn, hix sim unq lo, de doq bang duzmeuzhau uet raemxda, doq gangj:“Mwngz mbouj guh bouxgik, miz maz hag mbouj rox ne? Meuzhau meuzndaem, gaeb ndaej duznou couh dwg meuz ak.”Duzmeuzhau dingq le ngaek gyaeuj dekdek riu lo, gwnz naj de lij venj miz raemxda dem.

(sat)