7 nyied 25 hauh, ciengjvwnzyoz lwgnyez maenhndei daengx guek gaiq daihcibngeih bingzsenj sat, daengx guek miz 18 bouh（bien） cozbinj ndaej ciengj, canghraiz Gvangjsih Vangz Yungjyingh cozbinj 《Daxdaiq Langzdung》 ndaej ciengjsawcuenh, neix dwg gek 15 bi, canghraiz Gvangjsih youh aeu ndaej aen ciengj neix. Daengz seizneix, Gvangjsih gaenq miz 3 bouh cozbinj ndaej aen ciengj neix.

Cozbinj dwg aeu ndwenngoenz daihneix guh lamzbonj, lwnh cauh gij yienghsiengq dah lwgnyez daj baknaek gangj noix daengz bakvan bakraeuz ndeu, caeuq gij yienghsiengq boux daxdaiq ginggvaq haemzhoj sienhsoh hix mbouj bienq ndeu. Vangz Yungjyingh dwg Gvangjsih Cozgyah Hezvei fucujsiz、canghraiz vwnzyoz lwgnyez mizmingz, okbanj miz 100 lai bouh cozbinj vwnzyoz lwgnyez, ndaej ciengjvwnzyoz lwgnyez gozci Cinz Bwzcuih、ciengjsawdoz lwgnyez Binghsinh daengj gvaq. Cozbinj 《Daxdaiq Langzdung》 ndaej ciengjgim ciengjsawcuenh lwgnyez Cauz Vwnzsenh boicieprengz gaiq daihsam gvaq. Ciuq cam rox, ciengjvwnzyoz lwgnyez maenhndei daengx guek dwg bi 1986 laeb, caeuq ciengjvwnzyoz Mauzdun、ciengjvwnzyoz Lujsin、ciengjcinmaj cauhguh vwnzyoz minzcuz vunznoix daengx guek caemh dwg seiq aen ciengj vwnzyoz hung daengx guek, muzdiz dwg gikcoi cauhguh vwnzyoz lwgnyez maenhndei, doinyoengx vwnzyoz lwgnyez mwnhoengh hwngfat, dwg aen mingzdaeuz ceiq hung vwnzyoz lwgnyez Cungguek.

（daj 《Gvangjsih Yizbau》 aeu daeuj genj hoiz Linz Seznaz）