7 nyied 14 daengz 25 hauh, gaiq daihhaj bouxgangjgej gojgaeq saekhoengz doxdax youq Huznanz Cangzsah guh, doxdax dwg Cunghyangh Senhconzbu、Vwnzva Caeuq Lijyouz Bu、Guekgya Vwnzvuzgiz doxcaez cawjbanh. Aen duenzdaiqbiuj Gvangjsih baez nduj ndaej baizgim cujciennieb aen doxdax neix, Cwngz Veih bouxgangjgej Gvangjsih Minzcuz Bozvuzgvanj ndaej mingz daihngeih cujciennieb, ndaej haeuj aen hangzlied “bouxgangjgej baizgim” daengx guek.

Gaiq doxdax neix dwg vihliux geiqniemh bouxminz Cungguek dingjhoenx Yizbwnj nem seiqgyaiq fanj fazsihswh cancwngh ndaejhingz 80 hopbi, ciuyinx 175 boux bouxgangjgej maenhndei daengx guek 31 aen swngj（swcigih、cizyazsi）、Sinhgyangh Swnghcanj Gensez Binghdonz caeuq bingdoih hidungj daeuj camgya doxdax, doeklaeng bingzsenj ok “bouxgangjgej baizgim”“bouxgangjgej gagnyienh baizgim” gak 10 boux. Boux daiqbiuj Gvangjsih camgya doxdax, Cwngz Veih baengh bonjsaeh ak caeuq gojgaeq yinx ndaej cingzcik ndei.

Ciuq Swcigih Vwnzva Caeuq Lijyouz Dingh mizgven bouxfucwz lwnh, Gvangjsih itloh yawjnaek hwnqguh aen doih bouxgangjgej saekhoengz, gaenq laebdaeb haj gaiq baij vunz camgya aen doxdax neix, seiq gaiq gonq boux ndeu ndaej aen mingzdaeuz baizgim cujgagnyienh, 6 boux ndaej bouxgangjgej maenhndei cujciennieb、3 boux ndaej aen mingzdaeuz bouxgangjgej maenhndei cujgagnyienh. Baezneix ndaej baizgim cujciennieb, yaek gya lai doinyoengx vatcimh caeuq cauhmoq cienzboq gojgaeq saekhoengz Gvangjsih, coenghrengz Gvangjsih baeyouz saekhoengz hwngfat ndei saed.

(Cuh Yingjyih Mungz Gingcinh)