7 nyied 11 hauh banhaemh, Gvangjsih Gaiq Daihcibseiq Hagseng Yindungvei youq Gvangjsih Gohgi Swhfan Yozyen haimuq. Gaiq hagseng yindungvei neix dwg Swcigih Gyauyuzdingh、Swcigih Dijyuzgiz caeuq Gunghcinghdonz Gvangjsih Gihveij doxcaez cawjbanh, dwg aen hoihhoengh dijyuz cunghab daengx gih hagseng caeuqfaenh lailang.

Gaiq doxdax neix dwg baez genjniemh hong dijyuz hagdangz daengx gih ndeu, hix dwg baez gyoengq doengzhag langhbaij ndang cangq、bonjsaeh doxdax caeuq yienghsiengq cingsaenz ndeu. Mwh haimuq langhbaij ciengz heiq vwnzdij ndeu, ca mbouj lai 900 lai boux hagseng caez dwkgienz、guh dijcauh caeuq diuq fouxgyongnaezhenj, langhbaij swnjcienz minzcuz vwnzva、lai minzcuz doxgiet buekguh caeuq gij gyaeundei swnghdai baihcungqgyang Gvangjsih okdaeuj hawj bouxyawj yawj.

Ciuq cam rox, doxdax gungh miz 11 aen hangh hung、305 aen hangh iq, youz Gvangjsih Gohgi Swhfan Yozyen daengj 16 aen danhvei ciepbanh. Miz daengx gih 14 aen si laeb gih、81 aen gauhyau caeuq 25 aen gihciz cungdaengj cizyez hagdangz bauqmingz camgya, yindungyenz、gyaulenyenz、bouxgagnyienh doengh gij vunz neix mauhgvaq 2 fanh boux, soq aen danhvei camgya doxdax caeuq soq vunz camgya doxdax cungj beij gaxgonq lai.

（daj 《Gvangjsih Yizbau》 aeu daeuj hoiz Cinz Yuzyenz）