Saedceij lumj fuk veh gyaeundei ndeu, riunyumj cix dwg gij saekcaij ndaw veh ceiq lingzdoengh haenx; saedceij lumj souj go ndeidingq ndeu, riunyumj cix dwg gij fouzhauh ceiq gamjdoengh vunz ndaw hot fwen; riunyumj, dwg vahgawq ceiq gyaeundei ndawbiengz, de ndaej cienzsoengq raeujrub、hawj vunz ligliengh, sawj saedceij bienq ndaej engq gyaeundei.

Gou seiziq, mbei iq dangqmaz. Miz mbat ndeu, bohmeh daiq gou bae benz dat. Muengh aen dat sangvidvid haenx, doiq gou daeuj gangj, neix saedcaih beij benz mbwn lij nanz. Hoeng bohmeh gujli le, gou lijdwg gag cangqdamj, daenj mauhgang naek- gywg, cug ndei cag’ancienz, hainduj benz dat lo.

Gou gannanz dwk benz doxhwnj, moix yamq cungj siujsim riri. Dang gou benz ndaej loq sang seiz, nyaenx mbouj ndaej yawj dauq laj da ndeu, baihlaj lumj aen vaengz laeg fanh ciengh ndeu, ndaw sim fwt dwglau dangqmaz, ga gou hainduj mbouj souh gaemhanh dwk saenzdwddwd, gou dingzyouq mbouj benz doxhwnj. Gou ca gaenj cag’ancienz, raemxda nyoenx daengz ndaw gvaengzda.

Daxmeh raen gou yienghneix lau, you dangqmaz, de doq sing hung hemq gou haenqrengz benz, doq naj loh riu. Gij riunyumj haenx lumj nditrongh seizdoeng, cig ciuq haeuj ndaw sim gou, gyaepsanq gij dwglau haxbaenh. Gou dauqcungz cingsaenz hwnjdaeuj, vaiqvid gvaq le doenghgij gvangaj baihlaeng, dwg gij riunyumj daxmeh hawj rengz hawj gou.

Hoeng, aen gvangaj ceiq- laeng —— byaij seigang, youh hawj gou yamq haeuj dieggungz. Dieg sangngaungau neix, cij miz diuz seigang saeqsisi ndeu, gou ndaw sim lau dangqmaz. Gou da yawj coh daxmeh, muengh de gouq gou, daxmeh youh caiq raeujrub dwk riunyumj hoizwngq gou. Mbatneix, gij najriu de lumj diuz ndit banhaet ndeu, daiq gij ronghgywg maqmuengh, sawj rumznit gaxgonq bienqbaenz le rumzraeuj. Gou sup gaemz heiq hung ndeu, haenqrengz byaij bae, cimyawj baihnaj, baez yamq baez yamq byaij gvaq le seigang. Byaij sat seizde, gou gikdoengh dwk coemj haeuj ndaw rungj daxmeh bae. Cingqdwg gij riunyumj daxmeh, hawj gou miz damjliengh hoenxhingz gunnanz.

Riunyumj, bingzciengz mbouj miz vunz dwen de, hoeng de cix miz gij ligliengh mbouj liux mbouj nauq. De ndaej youq raeuz roxnyinh mboujmiz bangcoh seiz nai raeuz, youq raeuz roxnyinh ndaw sim lau seiz daiq daeuj damjliengh, youq mwh raeuz guh saeh mbouj swnh gujli raeuz. Mbat riunyumj genjdanh ndeu, mboujdan ndaej raeujrub aensim bouxwnq, hix ndaej hawj bonjfaenh souhaeuj angqyangz.

Hawj raeuz youq ndaw ndwen- ngoenz riunyumj lai di ba, yungh riunyumj hoenxhingz moix aen gunnanz, yungh riunyumj cienzndenq moix faenh raeujrub. Aenvih, riunyumj ndaej sawj ndwenngoenz bienq ndaej engq gyaeundei.

(Cenz Yiz Vwnzdungz raiz

Nungz Cinfung hoiz)