“Seizgan lumj raemxdah lae bae, hwnzngoenz mbouj duenh.” Seizgan menhmenh gvaqbae, dou hix menh- menh majhung. Vunzcaen henhoh, lauxsae son’gyauq, bouxdoih daez- singj, ceksaw gangj dauhleix, swngh- hoz rumzrumz fwnfwn roxnaeuz caengzging maezvaeg, doeknaiq caeuq roxsingj, gizgiz cungj youq diuzloh seiqvunz dou louz miz gij riz ngaeuz de, hawj dou moengjmoengj doengj- doengj byaij coh baenzvunz.

Gou “seiznyaeq mbouj rox ronghndwen, heuhguh batnyawhhau”, seizneix, daxmeh couh naihsim lwnh gou nyi, aen neix dwg ronghndwen, lij lwnh gij gojgaeq “Dah Cangzngoz Mbin Ronghndwen” hawj gou nyi, de unqswnh gangj daengz dah Cangzngoz baenzlawz gwn roengz siendan, mbin coh ronghndwen, gou dingq ndaej yinxsisi, lumjbaenz swhgeij hix youq ndaw ronghndwen gvaengx mbin. Gou caenh ngaeuq daxmeh gangj gojgaeq, yaephe boemz youq gyaeujhoq de, yaephe youh saetsaet diuqdiuq heux de baenq. Gojgaeq dingq lai le, gou couh ndaenggon lwnh hawj gyoengq nyezdoih nyi, gyoengqde baiqfug dwk cim gou, gou gig yiengjsouh cungj cingzcik neix.

Yamqdin seizgan mbouj dingz byaij bae, yaepyet gou couh haeuj siujyoz lo. Siujyoz hawj gou hag rox le hauqswnh bohmeh, hix hag rox le haujlai Sawgun. Moix baez gou fanhai bonjsaw yawjraen gij cabdoz seng- doengh caeuq gij gojgaeq mizyinx haenx, lwgda hix raen ndaej engq gvangq, mbouj caiq ngaeuq daxmeh gangj gojgaeq hawj gou, cix dwg swhgeij gag yawj saw caiqlix cingj daxmeh son cih saw gou mbouj rox haenx. Riengz gou rox saw demlai, gij nienzgeij gou hix demlai, gou hainduj hagsib doglaeb swnghhoz, lumjbaenz swhgeij daeb denz, dangyienz gijneix noix mbouj ndaej daxmeh bangfwngz. Daengz siujyoz sam nienzgaep, riengz gij hagsib goqmoeg demlai, gij guhcaemz seizgan gou yied daeuj yied noix, nyapnyuk hix daeuj riengz lo. Gou dauqdaej mingzbeg “lwgnyez iqet, mboujmiz nyapnyuk, baez yaepda, nyapnyuk bienq lai lo” gij eiqsei gawq vah neix lo. Gou youq ndaw saw hag rox le haujlai cihsiz, hag rox le Yinghyij, ndaej yungh Yinghyij caeuq vunz doxdongx. Riengzlaeng menhmenh majhung, gou hix rox hozhaenz lo, yawjraen bouxwnq miz doxgaiq guhcaemz moq, miz saejdaeuz gou hix ngaeuq daxmeh aeu, hoeng daxmeh mbouj dwg yienghyiengh hawj gou rimhoz, de hawj gou roxnyinh “lajmbwn mboujmiz gij haeuxliengz gwnndwi haenx”. Youq haj nienzgaep baez gaujsi ndeu, gou gauj ndaej gig yaez, youq gwnz roen ma ranz, gou gag sim mbouj onj. Dahraix, gou deng daxmeh ndaq lo, riengzdaeuj swyouz hix mboujmiz lo, seizgan deng daxmeh baijbouh ndaej rimmwdmwd. Doek- laeng, gou hix mbouj hawj caezgya saetmuengh, hagsib cingzcik youz yaez bienq ndei, daxmeh cij cuengqsoeng guenj gou. Roek nienzgaep dwg siujyoz duenh gatlaeng, youq ndaw bi nyaengqnyi’nyi neix, gou hag ndaej haujlai cihsiz mizik caeuq dauhleix guh vunz.

Riengzlaeng seizgan gvaqbae, gou yamq haeuj cunghyoz lo, gyoengq hujgeiq gaxgonq gag boux gag bae gak dieg. Haeuj cunghyoz le, seizgan engq noix lo, hagsib nyaengqnyi hawj gou noix bae haujlai seizgan guhcaemz, hoeng hix soundaej gij cingzngeih cingqcaen haenx. Hainduj gou mbouj gvenq gij diegdeih hagsib moq, hoeng gou roengzrengz diuzcingj gij simcingz gou, caemhcaiq miz hujgeiq bangcoh le, swnhleih sug le cunghyoz swnghhoz.

Youq gij ndwenngoenz neix, gou menhmenh majhung, rox daengz bohmeh mbouj yungzheih caeuq gij dwgrengz baihlaeng de, hix rox ndaej engq lai dauhleix, gou mbouj caiq euqsingq, hix mbouj caiq heuh’aeu. Gij raemxhanh daxmeh sawj gou engq giengiengz, lauxsae son’gyauq caeuq gij dauhleix ndaw saw sawj gou engq coengmingz, caengzging maezvaeg doeknaiq caeuq roxsingj hix vih gou majhung bu loh. Youq gij saedceij gvaqbae neix, aen simlingz gou majhung lo, aen dungxsaej gou bienq coengmingz lo, couh yienghneix, gou menhmenh majhung lo.

(Loz Swjgiz raiz Yinj Fuzgen hoiz)