Eu coenz fwen ndeu hawj Dangj dingq,

Gij aencingz Dangj beij meh caen,

Roengzrengz guh hong bae bauqaen,

Gaenriengz Dangj byaij ndaej an’onj.

Caetit youh dwg Dangj ngoenzseng,

Bineix Dangj seng bak lingz seiq,

Daengx guek lwgminz caen vuenheij,

Caez hoh Dangj souh beij bya sang.

Miz Dangj cij miz Cungguek moq,

Cungguek loqsiengj aeu guh daengz,

Aeu Dangj cwngcwz daeuj guh daeng,

Lwgminz siengjmuengh naengz saedyienh.

Samcung Cienzhoih baez ciuhai,

Lwgminz angq lai simdaeuz raeuj,

Gaeq bit bya noh caih mwngz aeuq(dumq),

Gwn imq daenj raeuj gaiqgaiq ndei.

Lwgnyez doegsaw miz ci soengq,

Gyoengqvunz saedceij gyaeu lumj va,

Ngaenzcienz ciengxlaux bibi gya,

Ywbingh guekgya hawj gemjmienx.

Gak cuz yinzminz gaen Dangj byaij,

Doxmaij doxgiet lumj sigloux,

Daengx guek yinzminz caez gyayouz,

Itheij byaij haeuj seizdaih moq.

Mbanjcuengh miz fwen eu mbouj caez,

Doxra hwnjdaiz bae danq Dangj,

Bouxboux cungj miz vahcaen gangj,

Dangj beij daxmeh aencingz caen.

Cib hot sei miz cib faenh cingz,

Ndawsingz lajmbanj bouxboux haenh,

Miz Dangj yinx roen raeuz akmaenh,

Haenh Dangj cingzngeih ciengq mbouj

caez.