Ranz sang fanh ciengh baengh giekdaej,

Faex hung cien cik baengh rag mwn,

Saedceij gyoengqraeuz gvaq ndaej ywnz,

Baengh Dangj gaemfwngz byaij roen cingq.

Ranz sang fanh ciengh baengh daej maenh,

Rumz haenq fwn naek cungj mbouj you,

Cungguek miz Dangj daeuj daiqdaeuz,

Gyoengqraeuz an’onj gvaq saedceij.

Gwn raemx gaej lumz boux vat cingj,

Gwn bingj gaej lumz boux muh mba,

Daengx guek gyaeundei lumj suenva,

Dwg Dangj daiq raeuz gvaq gungznanh.

Gwn raemx gaej lumz boux vat mboq,

Gwn noh gaej lumz boux ciengx mou,

Dangj dawz ngoenzndei soengq hawj raeuz,

“Caetit” ngoenzseng aeu geiqmaenh.

Gwn bya gaej lumz boux vat daemz,

Duet haemz gaej lumz Gungcanjdangj,

Ngoenzneix saedceij gvaq ndaej angq,

Miz Dangj raeuz cij raen ngoenzndei.

Va rang baengh miz ndit daeuj ciuq,

Faex heu baengh miz fwn daeuj un,

Dangjgeiz bae gonq bongh lumj rumz,

Saeh iq saeh hung yienghyiengh swnh.

Daxboh dwgrengz raeuz aeu rox,

Daxmeh sinhoj raeuz aeu geiq,

Dangj hawj gyoengqraeuz soengq fukgveiq,

Daihgya aeu geiq ndaw simdaeuz.

Bouxvunz simhai nienz mbouj geq,

Garoen bingzrwd ceq(ci) mbouj vaih,

Cungguek baenaj miz Dangj daiq,

Lwgminz daihdaih cungj vuenyungz.