7 nyied 5 hauh, Gaiq Daihcibhaj Daengx Guek Yindungvei vunzlai doxdax ruzlungz hanghmoeg gietsaiq youq Gvangjdungh Fuzsanh guh, doih Gvangjsih ndaej cuj bouxsai 22 boux ruzlungz 100 mij roensoh doxdax ngaenzbaiz. Neix dwg Gvangjsih youq gaiq yindungvei neix aeundaej gaiq ciengjbaiz daih’it.

Gaiq Daihcibhaj Cenzyinvei vunzlai doxdax ruzlungz hanghmoeg laeb cuj bouxsai（22 boux ruzlungz）、cuj mehmbwk（12 boux ruzlungz） caeuq cuj sai mbwk doxgyaux（22 boux ruzlungz）, hamzmiz 100 mij、200 mij、500 mij roensoh doxdax daengj 9 aen hangh iq, miz daengx guek gak dieg 23 aen doih ruzlungz daeuj doxdax. Doih Gvangjsih caeuqfaenh cuj bouxsai 100 mij、200 mij roensoh doxdax, cuj mehmbwk 100 mij roensoh doxdax, cuj sai mbwk doxgyaux 100 mij、200 mij roensoh doxdax gungh 5 aen hangh iq doxdax.

Ciuq cam rox, aen doih ruzlungz Gvangjsih neix cungj dwg vunz Dwngzyen, dwg ganbu cizgungh caeuq bouxgyaez ruzlungz gapbaenz, mbouj dwg gyoengq boux ciennieb, aenbaez yungh seizhoengq bae lienh. Caenhguenj lienh hoj, hoeng gyoengq duiyenz baengh simgyaez ruzlungz doxdax caeuq gij rengznyangq gengget, dauqdaej youq daengx guek doxdax ndawde ndaej oknaj ndaej mingzdaeuz, langhbaij gij rengzak caeuq yienghndei ruzlungz Gvangjsih.

(daj 《Gvangjsih Yizbau》 aeu daeuj genj hoiz Ginh Siengzyi Liengz Genzswng)