Youqndwi naengh dingh, yawj va hai va loenq, fwj mbe fwj roux. Valeiz ndaw gyanghongh mbinyagyag, lumjbaenz youq de gangj aen goj ndwenngoenz nei. Seizhaenx, aen doulaux ndaejgeiq laeglaeg lemxlemx haidou: Fwn iq doek mbouj liux mbouj nauq, valeiz homfwdfwd, seizgan baefoedfoed mbouj doxdauq.

Yag fwn unqnemnem dwk roq valeiz, limqva riengz rumz biufoux. Seiz iq, valeiz hai rim gyanghongh iq, ndit ciuq youq gwnz limqva, myab gij ronghgywg maezvunz okdaeuj. Gou moengjdoengj yawj dwk, daiq byaij gvaqdaeuj, yawjraen gij ngeizvaeg ndaw lwgda gou, riunyumj doiq gou naeuz:“Gijneix dwg valeiz, de hausak mbouj mbanq, daiq muengh mwngz lumj valeiz ityiengh cinghseuq gyaeundei.”Gou rox dingz rox mbouj, dawz coenz vah neix geiq youq ndawsim. Mizseiz, gou cam daiq:“Vih gijmaz valeiz baenzneix hom ha?”Daiq naj mboeng dwk yawj gou, saenzmaed dwk naeuz:“Majhung le mwngz couh rox lo.” Vwndiz lumj naed fwn caeuq gij hom valeiz gyonj baenz ndangdog, nyinh haeuj ndawsim laeq nyeziq, moek roengz naedceh cinghseuq ndeu, dinghdingh caj de maj.

Fwn lumjbaenz diuz mae doekroengz, doek youq gwnz limqva, fat ok gij sing mbaeu he, lumj dwg daiq youq henz rwz mbaenj, hawj sim gou raeujrub liux. Ngoenz bae ngoenz, bi bae bi, mbouj rox gvaqbae geijlai bi’ndwen. Gou caiq dauqma diegcoj, ndaw gyanghongh iq cienz ok gij fwen sing iq he:“Mbwn laepfonx doekdaemq, ndaundeiq caemh ronghmyanz, ronghrib mbin, ronghrib mbin, mwngz nyinh siengj bouxlawz?”Hot fwen neix couhdwg hot fwen gou seiz iq caeuq daiq itheij ciengq. Gou fwt angq, gipmuengz buet haeuj gyanghongh iq bae. Daiq raen gou le, couh naj hai naj riu, lienzmuengz rag gou roengznaengh, lwnh gij saeh mizyinx de, gangj gij vah raeuj sim haenx. Naet le, gou couh ninz youq gwnz eijninz daiq, ing henz ndang daiq hoemq fan moeg iq hom valeiz. Saekseiz, daiq dawz mbaw gaenfwngz mbouj caengz siuq liux he, baez cim baez mae nyib hwnjbae. Gou cam daiq dwg siuq gijmaz, de riu dwk naeuz:“Caj mwngz majhung le couh rox lo.” Gijneix hawj gou ngah muengh dangqmaz.

Seizgan laeglemx gvaqbae, daengz seizneix, cij lw mbaw gaenfwngz coux rim goj haenx lo. Gwnz mbaw gaenfwngz nyib baenz duj baenz duj valeiz caeuq gij fwn moenqfefe de, cim mae deihdwddwd, lumj gij gyaez mbouj yaemmuenz haenx, dawz gij vah haeujhoz gangj mbouj liux de caemhcaez siuq hwnj gwnzde bae. Daiq aiq dwg bienqbaenz valeiz lo! Mboujnex valeiz vihmaz baenzneix hom. Coenz vah “majhung le mwngz couh rox lo”daiq gangj gvaq haenx, seizneix gou cungj rox lo. Hoeng danghnaeuz rox aen dapanq de le couh aeu doxbiek, yienghneix gou nyienh baenz ciuh vunz cungj mbouj aeu rox.

Fwn iq lajbiengz dwg mwngz, gij hom geh mbaw leiz dwg mwngz, ndaw gij fwn mok diegcoj Gyanghnanz, gizgiz cungj miz ngaeuz mwngz. Mwngz dwg fwn iq ndaw sengmingh gou, nyinh gij goek sim gou, ce aen yaenqgeiq coh heuh “gyaez” hawj gou. Danghnaeuz bi’ndwen siu bae, ndaejgeiq myoxmyoet, gou hix mbouj lumz ndaej mwngz. Daiq, mwngz yaek rox, lajbiengz lij miz boux vunz ndeu hwnzhwnz cungj ndiepniemh mwngz ne!

(Loz Vwnzcin raiz Veiz Yen’gyangz hoiz)