Seizhwngq, nditndat baenz feiz, gwnz dieg couh lumj aen rek daej bingz hungloet ndeu, ciuq dak daengxcungq doxgaiq. Ndaw doenghnaz, doenghbaez doenghgij duzmbaj mbin bae mbin dauq haenx hix mbouj raen ngaeuz lo, couh lienz duzdaek hix ndoj hwnjdaeuj lo.

Geij ngoenz gonq, daxdaiq lwnh gou, duhnamh ndaw reih baenz lo, couh caj ra ngoenz rengx ndei bae sou. Gou simhai deqcaj, couh gaux daxmeh, gouz de ngoenz sou duhnamh haenx hawj gou bae ndaw reih bangcoengh. Doeklaeng daxmeh doengzeiq lo, gou angqvauvau buet bae ndaw reih. Hoeng mbouj nyaengq geijlai nanz, gij angq banhaet bae reih sou duhnamh haenx gaenq siu bae fouz ingj fouz ngaeuz.

Daxmeh yaeng’yaeng uet gij hanh najbyak gou, unqswnh gangj：“Guhhong baenzlawz mbouj dwgrengz ne? Mwngz bae laj gofaex iq yietnaiq yaep ndeu gonq ba!”Gangj sat, de dawz hwnj aen daengqgeg henz bien, daiq gou byaij daengz laj gofaex iq. Seizneix, gij ngaeuz faex caxcagcag haenx youq ndaw hwngqndat ngauznged, seiqhenz cungj yienj ndaej naiqnueknuek. Daxmeh nda ndei daengqgeg, hawj gou naengh roengz, yienzhaeuh dawz aen’gyaep gwnz gyaeuj swhgeij roengz, daenj youq gwnz gyaeuj gou.

Seizneix, gou cij yawj yienghceij daxmeh:Fajnaj haumbup lumj nyawh doenghbaez de deng ndit dak baenz gaiq ndaem gaiq hoengz, byoem baih najbyak deng raemxhanh dumz, nyungqnyatnyat nem youq gwnz gyaeuj, gwnz gemjnaj lij miz diuz riz haed cag gyaep. Gou lienzmuengz duet buh re’ndit, ndenq hawj daxmeh：“Daxmeh, gizneix mbouj deng ndit geijlai, hawj mwngz!”Daxmeh cix ngauzngauz gyaeuj gangj：“Mwngz daenj, faexraemh neix dangj mbouj ndaej ndit geijlai. Danghnaeuz fatsa le, mwngz deng nanzsouh! Lai gwn raemx, youq neix naengh ndei!”De hawj gou daenj aen’gyaep ndei le, youh bae ndaw reih nyaengq hwnjdaeuj.

Yawjraen ndangngaeuz daxmeh youq laj ndit haenq guhhong, gamjsouh aen’gyaep lij miz di raeuj daxmeh, ndaeng gou miz di fat soemj, raemxda yiemq ndaw lwgda. Seizhaenx, vuenyungz lumj raemxlangh nei nyoengx hwnj gwnz gyaeuj gou. Daxmeh cungj dwg bakcot sim’unq, bingzseiz yawj lumj yiemzhaenq, gizsaed ndaw sim cungrim le ndiepgyaez. De cungj dwg yungh gij ndang swhgeij mbouj coekak haenx, mbouj oksing vih gou dangj rumz cw fwn……

Du——Sing dig ndeu dajduenh ngeixnaemj gou. Gou nyeux gyaeuj yawj, daxda hai cisamloek daeuj daeh duhnamh lo. Daihgya caezsim okrengz, dawz gij duhnamh sou ndaej haenx daeh daengz gwnz ci. Daxmeh bongxbongx mbaq gou, daengq：“Mwngz caeuq daxda daxdaiq baema gonq.” “Mwngz ne?” Gou yousim yawj daxmeh. Daxmeh gangj：“Couh lw di hong ndeu, gou guh sat le couh baema.”

Cisamloek menhmenh bae naj, gou naengh youq gwnz ci, yawj ndang ngaeuz daxmeh liz gou yied daeuj yied gyae. Goriengma henz roen yaeng’yaeng ngauz, lumjnaeuz cingq lwnhgangj gij gyaez nyangqnyat caeuq fouzsing daxmeh. Gofaex iq caemrwg ndwndaengj bang gou dangj raemh haenx, couhlumj ndangngaeuz daxmeh mbouj oksing henhoh gou. Rumz dingj naj ci daeuj, couh lumj daxmeh unqnupnup umj gou nei. Seizneix, gou gig vuenyungz.

( Linz Yizmwz raiz Lingz Hinghningz hoiz )