Ndwencaet ndithoengz rongh bae gvangq，

Dangj raeuz aencingz geiq ndaw sim，

Fwnrumz bak bi vih lwgminz，

Simhai eu fwen haenh Dangj aen.

Nanzhuz Ruzhoengz cung langh bae，

Bak bi loh gyae vih beksingq，

Simnduj mbouj lumz rap sawjmingh，

Daiq raeuz beksingq ndaej fouqmiz.

Lwgfeiz diemj rongh Byacingjgangh，

Geizdangj biuyag youq byasang，

Hungmbwk saehnieb geng lumj gang，

Guekcoj hangzhangz ak gvaq doih.

Yenzanh cingsaenz ciuq rongh roen，

Doiqnaj miz oen hix mbouj heiq,

Dangj daeuj son’gyauq bouxboux geiq，

Daengx guek itheij caez fanzyungz.

Dangj cwngcwz lumj rumzcin daeuj，

Banhfap hawj raeuz ndei lailai，

Bak ranz cien hoh cungj fatcaiz，

Vunzlai bouxboux baengh Dangj ak.

Gohgi fazcanj mbouj yungh gangj，

Dangj raeuz yinx loh fuengyiengq mingz，

Gauhdez ruzmbin cungj riuzmingz，

Seiqgyaiq gingz fwngz haenh Cungguek.

Ranzmbanj gensez guh ndaej ndei，

Lumj sei lumj doz hawj vunz angq.

Vunzraeuz gaenmaenh Gungcanjdangj,

Roen gvangq loh bingz bae cien nienz.

Bya heu raemx loeg lumj fukdoz，

Bobo mak rim gingjsaek ndei，

Gak cuz doxgiet byaij doxbae，

Daihdaih gyaez Dangj youq ndaw sim.