Gaenh geij bi daeuj, Luzcai Yen aeu couqmaenh gij eiqsik Cunghvaz Minzcuz ranz vunz ndeu guh diuz sienqmeh, cizgiz damqra diuz loh moq “dijyuz + doxdax” “dijyuz + vwnzva” “dijyuz + gyauyuz” daengj, aeu dijyuz guh giuz, coicaenh gak minzcuz samgyau, vih couqmaenh gij eiqsik Cunghvaz Minzcuz ranz vunz ndeu daezhawj diuz loh saedhengz.

Doenggvaq guh hozdung doxdax lai cungj lai yiengh, saedyienh gak dieg lai lienzdoengh, coicaenh gak minzcuz sam gyau. Ciepbanh gaiq daih’it daengx guek hagseng(bouxcoz) yindungvei (nyingznaq hanghmoeg)、 2023 heux Gvangjsih goengloh danci seiqgyaiq liebbyaij doxdax (duenh Luzcai) daengj gozci ndaw guek dijyuz doxdax, gwnz ciengz doxdax yienh’ok gij yienghsiengq cingsaenz gak minzcuz doxgiet doxhwnj、 haenqrengz baenaj. Lienzdaemh damqra aeu “mbanj BA” guh caidij, guh dijyuz hozdung lajmbanj lanzgiuz doxdax, caemhcaiq yungh aen vunqsik “hamj mbanj gapdoih、 lai minzcuz doxgyaux bienbaiz”, lumjbaenz Swbaiz Cin “Gun Cuengh Myauz lenzdui”、 Cunghdu Cin “doih Cuengh Gun ranz vunz ndeu” daengj, hawj gak cuz duiyenz youq ndaw doxdax gyalai cingzgamj、 lai doxrox.

Aeu cieng、 sam nyied sam、 aen yangh ndeu aen ciet ndeu daengj guh seizgei, roengzrengz guh ndei gij hozdung doxdax miz minzcuz daegsaek “angj minzcuz dijyuz”. Lienzdaemh sam bi youq mwh sam nyied sam guh aen ciet angq feihyiz minzcuz dijyuz, baijok feihyiz dijyuz hanghmoeg ciengj bauqva、 foux lungzfiengz daengj. Youq gwnz gaihmusiz doxdax daihhingz anbaiz “langhbaij minzcuz vwnzva”, lumj- baenz biujyienj foux faexsaux Boux- cuengh、 foux gyongnamhhenj Yauz- cuz、 caijdinvenz Myauzcuz daengj, caemhcaiq laeb giz dieg langhbaij gaicawx gij gwn ndei feihyiz、 doxgaiq fwngzguh, saedyienh “ciengz doxdax ndeu、 lai yiengh daejniemh”. Youq segih、 lajmbanj hwnqguh minzcuz conzdungj dijyuz vwnzva cangzlangz, guh minzcuz dijyuz vwnzva cihsiz lwnhgangj, daezswng ginzcung nyinhdoengz caeuq roxnyinh minzcuz conzdungj dijyuz vwnzva miznaj.

Dawz bouxcoz nyezrauh dijyuz gyauyuz dangguh “gunghcwngz laeb giek” minzcuz doxgiet, doenggvaq dijyuz gyauyuz yungzhab beizyangj “bouxsijcej minzcuz doxgiet”. Youq cunghyoz siujyoz hailaeb dangz minzcuz conzdungj dijyuz, dazyinx caeuq gujli gak cuz hagseng cizgiz camgya gij conzdungj dijyuz hozdung hingzsik lai cungj lai yiengh, sengdoengh hozboz、 ndangcangq doxhwnj, lumjnaeuz foux haizgieg、 caij maxfaex、 dwkdom、 fouxsae daengj, daezsang gij cunghab suciz gak cuz hagseng, coicaenh hagseng cienzmienh hwngfat caeuq ndangcangq majhung. Guh hong genj cwkbwh dijyuz vunzcaiz, aeu gyonjcomz daengz lajmbanj senjbaz daengj fuengsik ciuseng genj caiz, vih 2026 nienz Gvangjsih Daihcibroek Gaiq Yindungvei dwk roengz gij giekdaej vunzcaiz ndei. Cizgiz genj baij yindungyenz camgya dijyuz doxdax gaep swcigih、gaep guekgya, 2024 nienz youq Gvangjsih bouxcoz nyezrauh denzging、 nyingznaq、 yaengxnaek、 cunglangh daengj hanghmoeg doxdax ndaej ciengjbaiz 34 gaiq.（Veiz Cinhyen/韦珍艳）