Mboengqneix, youq Nanz- ningz Si Vujmingz Gih, ciengz hozdung “ngoenz vwnzva caeuq swyenz yizcanj” ndeu haiciengz hoenghhwdhwd, hozdung cawjdaez dwg“yungzhaeuj ndwenngoenz daihneix——feihyiz cingq haux- seng”, lwnh feihyiz、baij feihyiz、haw feihyiz sam yiengh saeh laebdaeb guh.

Geij bi neix daeuj, Vujmingz Gih Dangjveij、Cwngfuj aeu baujhoh feihyiz yungzhaeuj daengx buenz “vwnzva ak gih” caeuq saenqhwng lajmbanj bae, guh bujcaz laebdangj, guhndei daengx aen mingzloeg guekgya、swcigih、Nanzningz Si、cwngzgih seiq gaep, okdaiz aen diuzlaeh baujhoh, laeb ngaenzcienz cienhangh, roengz goek maenhdwd bae cienzswnj dinfwngz gaeuqgeq.

Ciuq vunz lwnh, aen gih neix guh aen dajveh gungganq bouxcienzswnj, doenggvaq “bohsae faek lwgsae” caeuq “feihyiz haeuj ndawhag”, aeu hawfwen、heiqgoengsae、siuqva Bouxcuengh、conzdungj dijyuz haeuj dangzgoq bae. Seizneix, aen gih neix miz gak gaep feihyiz daibyaujsing mingzloeg 128 hangh、 bouxcienzswnj feihyiz daibyaujsing 32 boux, hwnqbaenz dieg son’gyauq cienzswnj feihyiz 32 aen.

Youq ndaw Dieg Baeyouz Gamjgoeng, gyoengq bouxhek ei diuz roen iq menhmenh byaij, cawz ndaej yawj gamj yawj bya, lij ndaej bae sawq gangj Vahcuengh、hag eu fwen. Youq Cwngzsiengh Cin Binhgyangh Segih “Diengzhong Fwngz Siuqva Nabfuk”, gyoengq mehdajsiuq cingq fwngz mbaeumbeng dajsiuq. Bouxcauh diengzhong、bouxcienzswnj feihyiz daibyaujsing dinfwngz dajsiuq Bouxcuengh Nanzningz Si Luz Lanzcinh riu naeuz：“Raizva ciuhgeq cauhmoq yungh daengz sieng daeh、doxgaiq dajcang, gwnzsienq lajsienq gai hoengh raixcaix, baenz gaiq ‘huqlaex Vujmingz’ miz daegsaek.” Doenggvaq “diengzhong+hozcozse+nungzhu” aen vunqsik neix, Vujmingz Gih bang laebguh 3 aen diengzhong feihyiz, sou 300 lai boux mehmbwk dawz mbanj caeuq vunz vutgungz bae guhhong, vunz bi bingzyaenz ndaej 3 fanh lai maenz ngaenz.

(Ganh Yenyaz Yungz Li)