Bonjbauq siusik(Cau Dwzfeih) Mboengq- neix, gicej cam Swcigih Minzcunghveij rox, bi 2025 Sawcuengh Vahcuengh suijbingz gaujsi yaek youq 7 nyied 13 hauh youq Gvangjsih Minzcuz Dayoz gauj.

Ciuq cam rox, baez gaujsi neix boux bauqgauj mboujguenj sai mbwk、minzcuz、bi’ndwen、haglig、guh hong lawz、dieg lawz、guek lawz daengj, ndaej ciuq gij saedsaeh bouxvunz aeuyungh, swyouz senj bauq aen daengjgaep lawz. Gaujsi neiyungz cujyau dwg gauj boux gaujseng yungh Sawcuengh Vahcuengh ndaej baenzlawz, baugvat gij giekdaej cihsiz Sawcuengh Vahcuengh、gap sawloih cauh coenz、yawjdoeg roxyiuj、fanhoiz caeuq raiz faenzcieng doengh gij neix. Gaujsi baen cogaep、cunggaep、gaugaep 3 aen daengjgaep, faensoq mbaw gaujgienj gaujsi muenxfaen 100 faen, gaujsi cingzcik 60 faen dwg diuzsienq biucinj habgek, gak daengjgaep baen gyap、iet 2 aen daengjgaep, 80 faen(baugvat) doxhwnj dwg daengjgyap, 60-79 faen dwg daengjiet.

Baez gaujsi neix bauqmingz dwg gwnz muengx bauqmingz, gaujseng gwnz muengx bauqmingz ndaej youq 6 nyied 20 hauh daengz 7 nyied 5 hauh hwnj Swcigih Minzcunghveij Vangj （http://mzw.gxzf.gov.cn/）, diemj aen lanzmoeg “Sawcuengh Vahcuengh gaujsi gwnz muengx bauqmingz” , ciuq bouhloh bae guh couh ndaej lo.