Cib’it、Banj Sawndip《Sae Youz Geiq》

Mbouj faen gienj, cek ndeu, 40 yieb. Mbouj rox coh bouxsij, Cinghgvanghsi cibhaj bi (1889 nienz) caubonj. Ceijsa, cangbwn, Sawndip causij, sawmaeg. Ceksaw sang 20.5 lizmij, gvangq 15.5 lizmij, moix buenq yieb baiz ndeu, moix baiz 16 cih saw. Bonj saw neix youq 1987 nienz daj Gvangjsih Laizbinh Si Hinghbinh Gih soucomz, seizneix yo youq Gvangjsih Bouxcuengh Swcigih Saujsu Minzcuz Gujciz Baujhu Yenzgiu Cunghsinh.

《Sae Youz Geiq》dwg Cungguek gujdenj seiq bonj saw mizmingz ndawde bonj ndeu, dwg sawcuenh fangzbaed bienraez Cungguek ciuhgonq bouh daih’it langman cujyi youz Mingzdai siujsozgyah Vuz Cwngzwnh biensij. 《Sae Youz Geiq》cujyau sij gij goj Dangzcauz Daicungh Cinhgvanh seiz Sunh Vugungh、Cuhbazgai、Sahswngh、Maxlungzhau seiq boux baujhoh Dangzswngh bae baihsae aeu sawging, gwnz roen ginglig hojnanh, itloh dwk iugvaiq duzfangz, gaijgez saeh yiemj, doeklaeng bae daengz baihsae, aeundaej sawging.

《Sae Youz Geiq》banj Sawndip, hix miz vunz heuhguh《Dangzswngh Aeu Sawging》 《Saw Dangzvuengz》daengj, dwg sawging goengsae Bouxcuengh guh yizsiz ndawbiengz ciengqdoeg yungh. Goengsae Bouxcuengh guh yizsiz, bouhloh haemq fukcab, gaengawq neiyungz mbouj doengz ciengz hung ciengz iq mbouj doengz, ciengz iq guh yizsiz buenq ngoenz, ciengz hung guh yizsiz baenz sam hwnz sam ngoenz, engqlij lai nanz dem. Vihliux ciuyinx bouxyawj, hix vihliux siucawz guh hong nanz baegnaiq, goengsae ciengzseiz guh yizsiz caeuq guh’angq dox gyauca hawj vunzlai soengsim. Gij hingzsik guh’angq ciengzseiz dwg guhfwen、gangjriu、gangjgoj daengj, loih neiyungz guh’angq neix baudaengz gojfangz cienzgangj、minzcuz lizsij、swnghcanj cihsiz、lunzlij daudwz, guhdaengz gij muzdiz cienzswnj vwnzmingz caeuq vunz baed caez angq.

《Sae Youz Geiq》banj Sawndip caeuq 《Sae Youz Geiq》banj Sawgun cengca haemq hung. Daih’it dwg neiyungz caezcingj fuengmienh, bonj Sawndip aenvih dwg yawj ciengzdieg aeuyungh, cij genjaeu mbangj gojgaeq, daengz Dangzswngh sou Cuhbazgai couh sat, beij bonj Sawgun noix haujlai neiyungz caeuq gojgaeq, gangjok ciengqgangj seizgan mbouj nanz. Daihngeih dwg miuzsij vunz caeuq gangj gij saeh haenx mbouj doxdoengz. Bonj Sawndip coenz vah yungh caet cih dawzyinh, gangjgouz dawzyinh, doeg bae raeuzrwd, hab gij sibgvenq Bouxcuengh bak gangj, hix engq yungzheih boih ciengq. Hoeng aenvih dwg caet cih dawzyinh, daengx bien faenzcieng mbouj faen ciengciet, doiq bouxvunz miuzsij caeuq gangj gojgaej beij bonj Sawgun noix haujlai, dandan dwg dwen daengz cix sat. Sam dwg bonj Sawndip yungz haeuj gij cauhguh gwndaenj caeuq fungsug sibgvenq dieg Bouxcuengh, gangjok bonj Sawndip doiq bonj Sawgun guh gaijcauh caeuq hwngfat. Lumjbaenz, ndaw saw sij Dangzswngh mbouj rox gij banhfap aeu sawging yiengq gak bouxhak gouzson seiz “aeu binhlangz guh laex”. Cungj laex neix dwg gij fungsug Mingz Cingh daengz Minzgoz seizgeiz dieg baihnamz gag miz, riuzcienz youq Gvangjsih、Gvangjdungh、Haijnanz、Daizvanh、Fuzgen doengh gij dieg neix, youq dieg Dunghnanzya hix hwng baenzneix guh. “Aeu binhlangz guh laex” oklaeng gij fungsug bak nyaij binhlangz, dwg gij fungsug ciuhgonq gij vunz ciuhgonq Cuengh Dung, raen sij youq ndaw saw lizsij Handai, cienz bae gyaenanz. Aenvih binhlangz miz gij goeng’yauq siucwk、gaj non、siu heiq、hengzraemx daengj, ndaej nyinhnaeuz dwg cungj huq gviq、noix miz、mizyungh ndeu, vihneix vunzlai yawj binhlangz baenz gij doxgaiq youqgaenj miz eiqngeih, ndaej gvangqlangh yungh youq daih hek、gietvaen、dajcaeq daengj gak cungj ciengzhab, guhbaenz gij fungsug sibgvenq “aeu binhlangz guh laex” baihnamz gag miz haenx.

Gyonj daeuj gangj,《Sae Youz Geiq》banj Sawndip oklaeng saw mizmingz ciuhgonq Cungguek《Sae Youz Geiq》, hoeng de mbouj ciuq buen cigciep hoiz, cix dwg guh gyagoeng lingh cauh, “gij daegdiemj Bouxcuengh” noengznwd, dwg gij cwngzgoj youqgaenj Cuengh Gun vwnzva gyaulouz yungzhab.