Bouxcoz nyezrauh dwg gyoengqvunz dawz rap youqgaenj couqmaenh gij eiqsik Cunghvaz Minzcuz ranz vunz ndeu, couqmaenh gij eiqsik Cunghvaz Minzcuz ranz vunz ndeu dwg gij hong youqgaenj seizdaih moq hagdangz guh hong minzcuz doxgiet baenaj son’gyauq. Gaenh bi daeuj, dou doenggvaq swhsiengj son’gyauq、vwnzva cimqnyinh、hozdung dapdaiz, haenqrengz guh ndei hong son’gyauq couqmaenh gij eiqsik Cunghvaz Minzcuz ranz vunz ndeu, mboujduenh fungfouq minzcuz doxgiet baenaj hamzeiq, cienzmienh daezsang hagdangz gyauyuz gyauyoz caetliengh. Hagdangz gonqlaeng aeu ndaej swcigih minzcuz doxgiet baenaj mozfan cizdij、 daengx guek minzcuz doxgiet baenaj mozfan cizdij daengj 30 lai hangh mingzdaeuz ndei.

Swhsiengj son’gyauq comz sim vunz. Hagdangz doenggvaq“vwnzva、vanzging、gocwngz、hozdung”seiq cungj son’gyauq fuengfap neix, doidoengh couqmaenh gij eiqsik Cunghvaz Minzcuz ranz vunz ndeu haeuj hagdangz、haeuj godangz、haeuj ukgyaeuj. Lai leihyungh haihag caeuq bizyez denjlij、banhoih doihhoih hozdung、faqciengz vwnzva daengj daeuj guh son’gyauq, hawj daengx hagdangz lauxsae hagseng cungj laeb gij leixniemh “seiq aen caezcaemh”, mboujduenh demhaenq “haj aen nyinhdoengz”. Ingbaengh gij gyaucaiz dungjbien haenx, moix singhgiz haibanh lauxsae hagseng gyangjco、sedonz saw veh minzcuz gocwngz gungh 23 monz, dawz couqmaenh gij eiqsik Cunghvaz Minzcuz ranz vunz ndeu cienzmienh yungz haeuj gocwngz dijhi bae laebguh. Dinghgeiz haibanh minzcuz vwnzva yenzyoz bozvuzgvanj gocwngz、feihyiz gocwngz daengj, hawj daengxgyoengq lauxsae hagseng cungj cienzswnj minzcuz vwnzva ndeiraeuh. Hailaeb ciengqheiq haeuj hagdangz、cietndaemndai、ciet minzcuz dijyuz daengj gocwngz, hawj son’gyauq couqmaenh gij eiqsik Cunghvaz Minzcuz ranz vunz ndeu engq miz yaugoj.

Vwnzva cimqnyinh demlai nyinhdoengz. Hagdangz dawz minzcuz doxgiet baenaj son’gyauq caeuq cienzswnj fathoengh Cunghvaz conzdungj vwnzva maenhndei dox giethab, doenggvaq ciengq gij go minzcuz doxgiet ndei、gangj gij gojgaeq minzcuz doxgiet baenaj ndei、veh gij veh minzcuz doxgiet baenaj ndei daengj fuengsik, ungganq boux senhgyangjyenz iq minzcuz vwnzva, hawj gij vwnzva ronghlwenq 56 aen minzcuz youq ndawsim gyoengq nyez roengz rag.

Hagdangz caep gij gingj ndaw hagdangz seiz cungj yungzhab gij doxgaiq maenhndei vwnzva Cunghvaz Minzcuz, gij gingj caep ndaw hagdangz haenx cungj yaenq wveizmaj youq henz, hawj hagdangz moix aen gencuz、moix giz gingj caep, cungj baenz gij gocwngz son’gyauq minzcuz doxgiet baenaj.

Hozdung dapdaiz daezswng yaugoj. Hagdangz hengzguh gij hozdung daegsaek son’gyauq ndiepgyaez gya guek、cienzswnj vwnzva maenhndei、ganqbaenz laexsoq Cunghvaz daengj, coicaenh dwz ci dij meij lauz haj yiengh caezcaemh son、cienzmienh fazcanj. Youq ngoenzciet conzdungj Cunghvaz caeuq ngoenzciet minzcuz, moix bi guh boux cienzswnj feihyiz iq ciengj aeu“naed baiz vasigloux”hozdung、 sevei sizcen daejniemh yenzyoz hozdung daengj, guhbaenz “yungz · comz ·ronz · doeng” diuz roenloh guh son’gyauq neix. Yawjnaek guh aen giva gak cuz bouxcoz nyezrauh gyaulouz, caeuq ndaw gih rog gih 13 aen hagdangz gietbaenz hagdangz caemhguh, lauxsae hagseng dox baedauq gyaulouz.

Mienhyiengh Dunghmungz gyagiengz gyaulouz. Hagdangz yawjnaek caeuq Dunghmungz、Gangj Au Daiz digih guh gij hozdung bouxcoz nyezrauh minzcuz doxgiet baenaj dox baedauq dox gyaulouz lai cungj lai yiengh haenx. Camgya Cungguek——Dunghmungz Feihvuzciz Vwnzva Yizcanjcouh hozdung, dawz “duzlingz gvai、raed ceij、 cizveh” daengj conzdungj vwnzva ndeiraeuh Cunghvaz faen loih faen buek bae langhbaij; cujciz lauxsae hagseng hagdangz “Gij Gvai Gvangjsih”daengj minzcuz yisuzdonz bae Yanghgangj、Aumwnz digih caeuq Sinhgyahboh daengj guekgya guh vwnzva gyaulouz, gaenxmaenx cienzboq Cunghvaz Minzcuz vwnzva. Caeuq Daizvanh guh bouxcoz nyezrauh cuzgiuz gyaulouz, baijok gij yienghndei Cunghvaz Minzcuz ranz vunz ndeu.

(Bien neix sien daeng youq 《Gvangjsih Yizbau》, bouxraiz dwg Nanzningz Si Sinhhingh Minzcuz Yozyau yaucangj)