Gietsoq, vunzcungnienz ndenq haj bak maenz hawj boux soungaenz, daxmeh Vangz Meijyen doeksaet naeuz:“Rox gwn bae gauhneix lai ngaenz, mbouj hwnjdaeuj gwn suenq lo, hawj lauxbanj hai bae baenzlai ngaenz, gou mboujeiqseiq lo.”

Vunzcungnienz daihfueng dwk naeuz:“Neix dwg aen bouqhaeux Nanzningz ceiq mizmingz, vihliux hawj song dah lwgnyez dwgcoh raen di seiqmienh, daej!”

（Ngeihcib It）

Heiqci song diemj buenq cung couh daengz ranz, song dah lwgnyez hemq naeuz: “Daengz ranz lo!” “Dauqdaej daengz ranz lo!”

Vunzcungnienz roengz ci, yawjraen, gogo faexhung dingj mbwn laeb deih, humx gvaq gvangjcangz iq humx gvaq ranzcienhuj, de doenghsim naeuz: “Lajmbanj gingjsaek ndei raixcaix!”

Vangz Meijyen cam: “Lauxau, caengz daengz diegbya dou, mwngz ngah makbug mbouj, dou bae daet geij aen hawj mwngz.”

Liuz Fanghfangh haeuj ranz aeu daeh, Vangz Meijyen benz hwnj faex daet makbug vit roengzdaeuj hawj Liuz Fanghfangh ciep aeu, cang haeuj daehnaengngwz bae ndaej byongh daeh, riuj daengz baihnaj vunzcungnienz, naeuz: “Makbug ce nanz le youh gam youh diemz.” Vunzcungnienz angq naeuz: “Huqdoj?” Daxmeh Vangz Meijyen naeuz: “Gou gaeb song duz gaeq hawj mwngz dawz baema.” Gangj sat, haeuj ranz aeu di haeuxgok daeuj vanq gwnz namh, geij cib duz gaeq buet humx gvaqdaeuj ciengj gwn, de dawz aen camj ndeu roemj roengzbae, ndaej seiq duz. Genj sam duz gaeq hung cang haeuj raepgaeq bae. Vangz Meijyen cam: “Lauxau, mwngz gyaez gwn sawzbwn caeuq sawzfaenz lwi, gou cang daeh ndeu hawj mwngz.”

Vunzcungnienz doeksaet naeuz: “Soengq baenzlai ha?” Daxmeh Vangz Meijyen naeuz: “Haeuxlaeng ndei gwn, gou cang seiqcib gaen hawj mwngz.”

Vunzcungnienz miz di mbouj- eiqseiq, Liuz Fanghfangh naeuz: “Lauxau, bimoq mwngz bae ranz gou, gou hix soengq haujlai doxgaiq hawj mwngz, laeng gou ciengx miz hanq hung.”

（Ngeihcib Ngeih）

Cinz lauxbanj heuh Vangz Gencingh bae ranzbanhgoeng gietsoq. Ndaw ranzbanhgoeng gwnz sahfaz caeuq Cinz lauxbanj bingzbaiz naengh dwg Laujuj. Vangz Gencingh miz di suksouj, Laujuj doq raix cenj caz ndat ndeu ndenq hawj de. Vangz Gencingh miz di launyaenq, Cinz lauxbanj riunyum- nyum heuh naengh roengzdaeuj. Gwn caz le, Cinz lauxbanj unqswnh dwk naeuz: “Vangz saefouh, suenqsuenq song doengh laeuz cawx bae geijlai bau hoi deng geijlai ngaenz？”（32）