Sai:

Nanz ndi’ndaej bae haw,

Okdou raen hoengzva,

Nanz ndi’ndaej raennaj,

Bae guhmaz li nuengx.

Mbwk:

Ngoenzlwenz ndaem duhnamh,

Haetneix ndaem lwgmaenz,

Sam nyied hawfwen daengz,

Naenq mwngz daeuj guh fwen.

Sai:

Sam haet youh bungz haw,

Mwngz guhyawz mbouj daeuj,

Gwnz haw vunz lai raeuh,

Yawz ndi daeuj guh fwen.

Mbwk:

Gofaex youq bangxgemh,

Mbaw seng vih rumzraq,

Doenghbaez fouz buhvaq,

Mbouj miz naj ok haw.

Sai:

Doenghbaez gou hix hoj,

Nanz mbouj rox bae haw,

Seizneix ndaej baenz ndei,

Bae haw guh fwen angq.

Mbwk:

Dangj banggungz roengzma,

Byadah bienq gimlungz,

Seizneix raeuz duetgungz,

Daeuj doxbungz guh fwen.

Sai:

Dangj banggungz daeuj daengz,

Lienz duzgaeng hix fouq,

Gaeqmeh riengz gaeqboux,

Duzduz rouj hoengz caez.

Mbwk:

Banggungz daengz noengzgya,

Lienz mou ma hix eiq,

Banggungz saedcaih ndei,

Ciengx gaeq bienq funghvuengz.

Sai:

Dangj hawj raeuz beixnuengx,

Daigvanj ciengx cwz yiengz,

Hozcozse cien guenj,

Caux cienz lae baenz mboq.

Mbwk:

Ciengx cwz vaiz bae gai,

Ndaej ngaenz lai faenhoengz,

Gwnz bya ciengx gaenglingz,

Cienz baenzgyoengq haeujma.

Sai:

Gohyoz ndaem nazreih,

Byaleix ciengx ndaw naz,

Sou haeux youh ndaej bya,

Rinsa bienq gimngaenz.

Mbwk:

Gvaqbae sinhoj lai,

Gwn byaekngaih ciengx mingh,

Seizneix raeuz duetbinz（gungz）,

Gwn nohcing hix ganx.

Sai:

Seizneix duetgungz gvaq,

Cancan bya riengz noh,

Buh vaq haiz cienz moq,

Byaijloh doengz mbaj mbin.

Mbwk:

Gaxgonq runghbya youq,

Okdou aeu bin dat,

Lumj duznou duzsap,

Raih cag gvaq bangxciengz.

Sai:

Dangj banggungz roengzma,

Bag bya hai fouqloh,

Vih raeuz mbouj caiq hoj,

Son raeuz doq gimgiuz.

Mbwk:

Heiqci daengz bakdou,

Lienz duzmou hix angq,

Bae haw naeuz bae mbanj,

Daenj haizmad naengh ci.

Sai:

Ndaw mbanj doeng gauhdez,

Bouxgeq eiq baeyouz,

Gyanghaet youq Gvangjcouh,

Haemh Hangzcouh sailaeuj.

Mbwk:

Seizneix raeuz runghbya,

Ranzhaz bienq ranzlaeuz,

Saenzsien gyaez daeuj youz,

Haenh ranz raeuz ceiq ndei.

Sai:

Gyouhnanz ndi roengz fwn,

Ra raemx gwn ndi meiz（miz）,

Haeuxyangz dai ndaw reih,

Gaeng dai vei（vih） hozhat.

Mbwk:

Seizneix raeuz runghbya,

Raemx gag ma daengz ranz,

Raemx leix van gvaq dangz,

Rengx nanz naz ndi hawq.

Sai:

Dangj banggungz daeklig,

Vunzgik bienq vunzgaenx,

Bouxhuk daenj coengmingz,

Bouxgungz cienz baenzfouq.

Mbwk:

Doenghbaez vunzgaujvaq,

Mbouj bae vaqhaeux gwn,

Hix mbouj bae gai fwnz,

Conhmwnz（cienmonz） dang lauxbanj.

Sai:

Doenghbaez goenggaidanq,

Ndi haeuj ndoeng coemh danq,

Bae guhcaemz ma ranz,

Riengz lwglan sailaeuj.

Mbwk:

Gvaq giuz mbouj lumz dwngx,

Gwn raemx mbouj lumz cingj,

Dangj hawj raeuz duetgungz,

Raeuz mbouj lumz fanhdaih.