Mboengqneix, Gvangjsih Nanzningz Si Vwnzva Gvangjden Caeuq Lijyouz Giz lwnh vunzlai rox, bi 2025 mboengq ngoenzgyaj ciet duenngux, Nanzningz Si comz vunz guh baenzroix saeh “vwnzva lijyouz dijyuz gaicawx” lai cungj lai yiengh, bouxhek okrog baeyouz angqvauvau. Ciuq gyoep- suenq, 3 ngoenz cuengqgyaj, Nanzningz Si gungh ciepdaih bouxhek 237.14 fanh vunzbaez, doengzbeij lai hwnj 12.1%; ndaej lijyouz souhaeuj 20.82 ik maenz, doengzbeij lai hwnj 13.3%.

Ngoenzgyaj duenngux ngamj bungz ciet lwgnyez gozci “roekit”, Nanzningz Si daengx ranz vunz okbae henz singz youz、bohranz lwgnyez caez guh’angq hawj vunzlai haengjgyaez raixcaix. Gak aen diegbaeyouz、diegguh- angq、vwnzboz cangzgvanj doengh gij neix doiok 28 hangh doenghyiengh mbouj aeu cienz roxnaeuz gai cienh, 14 aen diegbaeyouz A gaep laebdaeb doihengz “mbaw fei yungh sam ngoenz”, coihaeuj vwnzlij siuhfei laebdaeb hwnj lai.

Bae sawq bae caeuqfaenh minzsuz、vwnzva ciuhgeq hoenghhwdhwd. Suek faengx、soengq mbawngaih、guh daehhom doengh gij saeh neix vunz hix gyaez raixcaix, hawj ngoenzciet miz yinxdaeuz mbouj doxdoengz. Youq bi 2025 daengx guek ruzlungz caez lienzdoengh nem Nanzningz ruzlungz goenghaisaiq yienhciengz, foux lungz foux saeceij、eu fwen doengh gij saeh neix caeuq ruzlungz doxdax caez guh, caemhcaiq caeuq dieg gai gaiqgwn henzgyawj、danfaenzcauh cauh baenz “aen gien sawj cienz henz dah”， hawj bouxhek roxnyinh gij yinxdaeuz vwnzva duenngux Nanzningz.

Nanzningz Si gak diuz gai hix hopheux ngoenzgyaj doiok baenzroix yienghsaeh hawj gyoengq bouxhek gvaq ngoenzgyaj daegbied, hawj gyoengqde lai daeuj youz lai sawj cienz.

Ciuq soqgawq yienh’ok, mboengq ngoenzgyaj ciet duenngux, Nanzningz ngoenz bingzyaenz ciepdaih bouxhek、baeyouz sawj cienz faenbied doengzbeij lai hwnj 41.1%、43%； bouxhek gapgyaq cujyau dwg bouxhek baihrog, bouxhek rog gih Gvangjsih ciemq 65.0%, bouxhek rog Nanzningz ciemq 86.7%; banhaemh baeyouz sawj cienz ciemq cujyau, gveihmoz ciemq 63.6%, doengzbeij lai hwnj 51.8%; vunz dingh fei haeujdou dieg- baeyouz、bouxhek sawj cienz faenbied doengzbeij lai hwnj 230.5%、155.7%.

（Moz Lanzyenj）