Hawfwen hamj guek Cungguek Yeznanz 6 nyied 5 hauh youq Dieg Doxgap Baeyouz Hamj Gyaiq Raemxdiuqdat Dwzdenh(Banjyoz) Cungguek Yeznanz guh, canghheiq、bouxcoz Cungguek Yeznanz youq henz Dahgveihcunh aeu fwen foux gyau youx, aeu vwnzva cienz cingz, caez lwnh gij cingzngeih Cungguek Yeznanz song guek.

Dieg Doxgap Baeyouz Hamj Gyaiq Raemxdiuqdat Dwzdenh(Banjyoz) Cungguek Yeznanz dwg Cungguek aen nduj dieg doxgap baeyouz hamj gyaiq, dwg Cungguek Gvangjsih Bouxcuengh Swcigih caeuq Yeznanz Gauhbingz Swngj caezcaemh hwnqguh caeuq saedhengz, gyaiq dwg gadah Dahgveihcunh.

Ngoenzhaenx, canghheiq Cungguek biujyienj danz aendwngz 《Fwen Dahcej》《Danz Hwnj Aendwngz Sim Angqyangz》 doengh gij cezmuz miz daegsaek minzcuz neix, canghheiq Yeznanz yienj lienzciengq 《Hoihhoengh Gauhbingz》、senjduenh diuhgeq aendwngz 《Damqhaij》 doengh gij heiq neix. Canghheiq Cungguek habciengq 《Yeznanz Cungguek》, gangjok gij ngeixnaemj doxdoengz cienzswnj cingzngeih bouxminz song guek.

Geij bi neix daeuj, aen Raemxdiuqdat Dwzdenh（Banjyoz） Cungguek Yeznanz ndeu, hawj Gvangjsih Cungzcoj caeuq Yeznanz Gauhbingz Swngj doxgyau doxgap hoenghhwd. Youq Dieg Doxgap Baeyouz Hamj Gyaiq Raemxdiuqdat Dwzdenh(Banjyoz) Cungguek Yeznanz, bouxhek banh sat mizgven soujsuz haeujok gyaiq le couh ndaej guhbaenz “mbaw biuq ndeu youz song guek”“ngoenz ndeu youz song guek”, huq lai、gvaq gvan heih, ciuyinx yied daeuj yied lai bouxhek daeuj youz “dajgaj”; giekdaej sezsih hwnqguh “doxdoeng geng”、civei goujan “doxdoeng unq”, coihaeuj Cungzcoj caeuq Gauhbingz gizgiz diegdieg doxgyau doxgap mboujduenh ietraez、ngoenz lai gvaq ngoenz; laebdaeb guh gij yienghsaeh Cungguek Yeznanz yinzvwnz doxgyau, engqgya hawj song dieg bouxminz sim doxdoeng.

Ciuq gyoepsuenq, Dieg Doxgap Baeyouz Hamj Gyaiq Raemxdiuqdat Dwzdenh(Banjyoz) Cungguek Yeznanz daj 2023 nienz 9 nyied sawq guh daengz bineix 5 nyied mued, gaenq gyonj ciepdaih duenz baeyouz hamj gyaiq 2300 lai aen, lijyouz souhaeuj mauhgvaq 8000 fanh maenz ngaenz Cungguek.

(Yangz Cinz Yungz Dunghlinz)