Douci hai le, song dah lwgnyez lumj song duz roeg daj ndaw roengq mbin okdaeuj, doeng yawj sae yawj, gizgiz singjsien, gizgiz ndeiyawj, gizgiz cungmuenx geizheih. Vunzcungnienz roxnyinh daengz song dah lwgnyez neix hozoiq ndeiriu. Daxmeh Vangz Meijyen doiq vunzcungnienz naeuz: “Lauxbanj mwngz gaej dawz haeujsim, song fangzbyaiz neix mbouj rox ngoenzneix bak baenzneix lai.” Vunzcungnienz naeuz: “Caeuq song dah neix gangjgoj, gou ngeix daengz gij cingzgingj gyaeundei dahlwg gou seiz iq, de doeg dayoz yaek bizyez lo, gou ra mbouj raen gij saedceij ndei ngeihcib bi gaxgonq.” Doq gangj doq yamq haeuj daihding, song boux sai mbwk hauxseng daenj buhvaq doxdoengz youq dou songbaih ndwn dwk, vunz gyaeundei buhvaq hix ndeiyawj. Vangz Meijyen、Liuz Fanghfangh baez daih’it raen boux fugsaeh baenzneix saundei.

“Angqcoux gyoengqsou daeuj gwn haeux.” Boux fugsaeh lwgmbauq haenx simhoengz dongx naeuz, vunzcungnienz ngaekngaek gyaeuj.

Haeuj ndaw daihding, song dah lwgnyez dadaengx liux, bangx daihding deu lungz veh fungh, gwnz dingj mbwn lamz fwj hau, seiqhenz daihding gyasei faexhoengz daengj lumj bya sangngaungau fwj geuj raemx lae, heiqseiq hoengh dwk song dah lwgnyez da mbouj yaep saek di. Miz roek、caet boux vunzguekrog byaij doiqnaj daeuj, gig hung gig sang, ndaeng ngaeu lumj bakyiuh, da lamzhenj lumj da duzmeuz, saeknoh hau cab di hoengz, miz sam boux ndaem lumj danq nei, cijmiz heuj caeuq cehda hausagsag, song dah lwgnyez lau dwk gaemndaet fwngz vunzcungnienz.

Sam laeuz dwg daihding gwn haeux, dendih haidou, daegmbauq ndeu byaij gvaqdaeuj, hozunq dwggyaez naeuz: “Angqcoux sou ranz vunz ndeu daeuj gwn haeux.” Gangj sat, daiq gyoengq daengz aen daiz hoengq henz ciengz ndeu, raix caz hawj “ranz vunz ndeu” neix.

Yaep ndeu, dah lwgsau fugsaeh ndeu dawz bit caeuq bouh gvaqdaeuj, vunzcungnienz bienj danbyaek gwnz daiz, naeuz geij cungj byaek hawj bouxfugsaeh geiq haeuj bouh bae.

“Gwn caz ha.” Vunzcungnienz heuh daihgya.

“Gwn caz imq le, gwn gijmaz haeux dem.” Vangz Meijyen naeuz.

“Dungx iek yaek byoengq lo, gwn caz haeujbae gvet dungx byoengq engq vaiq.” Liuz Fanghfangh naeuz.

“Gou heuh gwn caz gwn saek di, mbouj dwg heuh sou gwn dwk imq bae.” Vunzcungnienz ngauzngauz gyaeuj riu dwk, swhgeij hix gwn mbouj baenz.

（30）