Mehyah hauqswnh, gij ceiq mbouj hab hozndat haenx, couhdwg hozndat coh vunz ndaw ranz, raeuz cungj gvenq gingq bouxnajseng, cix lumz ndiepgyaez vunz ndaw ranz, gijneix mbouj miz singq vunz. Coenzhauq mehyah hawj gou najmong raixcaix.

Haeuxniu dwg boux vunz caemh mbanj hai ci roen’gyae ndeu soengq daeuj. Sou ndaej liux gou dwk denva hawj daxboh, naeuz dou cimz gvaq gij haeuxniu ndaw ranz gvaq, hom dahraix, niu dahraix, baenz gwn dahraix.

Daxboh riuhoho naeuz, danghnaeuz sou gyaez gwn, gwn sat cix dauq aeu moq, ndaw ranz lij miz dem.

Sam： Ranzgaeuq Caeuq Duzmeuz

Raq fwn laux ndeu doek laemx dingjranz ranz gaeuq, daxboh heuh gou dauqbae caeuq de coih ranz.

Gou mbouj doi.

Aen ranz neix dwg daxboh gaxgonq gag hwnj baenz, de gyaez aen ranz neix dahraix.

Dou cingj vunz daeuj coih, danghnaeuz gag coih, yungh sam ngoenz cij coih ndei ranz gaeuq.

Gij goj aen ranz neix, mwh daxmeh lij youq de cix lwnh hawj gou mbouj rox geijlai baez gvaq.

Daxmeh naeuz, daxboh mwhgonq vih hwnj aen ranz neix yungh ngaenzcienz liux caez, daengz mwh gwn cieng, gaiq noh ndei ndeu cungj cawx mbouj hwnj. Mwh gwn haeux de, boux vunz Daeggengq de ndoj haeuj bo baihlaeng mbanj bae, caj daengz dinghcinj mbouj miz vunz daeuj ndaw ranz heuh de gwn haeux caengj mo laep dauq ranz.

Bi ranzgaeuq laemxlak, daxboh baenz baez bingh ndeu, youq ranzyw ninz le geij ngoenz caengj ndaej dauq ranz.

Bide, daxboh ndaej roekcib bet bi gvaq, ndang yied ngoenz yied geq, guhhong mbouj ndaej gvaq, hoeng de mbouj fug geq, ngoenzngoenz gwed faggvak de youq ndaw reih ndaw naz baenqbeq baedauq lumj ciengxgwq, de ndaej gag gvak song sam go rum ndaw reih haenx ndwi, doenghgo wnq de gvak mbouj hwnj gvaq.

Doeklaeng, daxboh ciengx duz meuz ndeu, daj miz duz meuz neix, de couh menhmenh lumz gij hong ndaw reihnaz, de aiq goj caengz lumz nauq, aenvih miz vunz lwnh gou nyi, daxboh ngoenzngoenz lij gwed faggvak bae ndaw reihnaz, hoeng mizseiz ngamq byaij daengz bakmbanj couh doxdauq, umj meuz naengh dwk dakndit laep da baiqraeujninz.

Duz meuz de gou raen gvaq, daengx ndang henjgim, dwg duz meuzmeh ndeu, lingzleih dwggyaez raixcaix, cawzok daxboh, mbouj hawj bouxwnq umj nauq.

Mwh duz meuz neix deng daxboh gip ndaej gaenq geq lo, aenvih henx ndok mbouj ndaej gvaq，daxboh cix ngoenzngoenz bae bouqnoh cawx di nohsamcaengz ma ranz faeg nuenz bae, liux cix cauj cug caeuq haeux doxgyaux gw de gwn.

Miz ngoenz ndeu daxboh naeuz gou nyi, duz meuz neix lix ndaej cib bi gvaq, vunz lix bi ndeu, duzmeuz lix bet bi. Couhdwg gangj, raeuz gvaq bi ndeu duzmeuz gaenq gvaq bet bi lo. Duz meuz neix caendwg maqhuz geq gvaq.

Miz ngoenz ndeu lauxdoengz gou daeuj yawj gou, dou gangjgoj cungj dwen daengz daxboh.

Lauxdoengz naeuz, mwngz rox lwi, geij bi gaxgonq, daxboh gou got gou lumj got lwgnyez yienghde daej. Seizde, gou doeg dayoz yaek bizyez gvaq, daxboh doiq gou naeuz, de lij naemj bae Gvangjdungh dajgoeng doz ngaenz. Gou rox, coenzhauq daxboh gou gangj daengz cix guh daengz. Gou caeuq de daeuj daengz camhhojceh, cawx biuq hawj de, soengq de hwnj ci. Bide de roekcib bet bi, youq Gvangjdungh dajgoeng gaenq cib geij bi lo, gung gou doeg dayoz, seizneix gou yaek bizyez, de vanzlij bae dajgoeng doz ngaenz. Gvaq mbouj geijlai nanz, de baenz bingh naek, youq ranzyw ninz le geij ngoenz, de youh doiq gou naeuz, de yaek dauqbae guhhong, song da de lumjnaeuz gouz gou nei. Gou youh yawj dwk de naengh hwnj aenci bae Gvangjdungh baez moq.

Naeuz liux gijneix, lwgda lauxdoengz gaenq miz raemxda yaek doek. De doq daej doq laebdaeb gangj.

Gvaq le sam ndwen, haemh ndeu, daxboh dwk denva hawj gou, baihde bakmwt, liux cix ndaej nyi diemcaw gig naek, sing de wng dwg daej gvaq miz di dumz miz di saenz.

Daxboh youq ndaw denva naeuz, lwg ha, gou naiq gvaq, gou naemj ma ranz lo. Seizhaenx, raemxda gou doq doek roengzdaeuj.

Gou naeuz, boh ha, gou bae coux mwngz dauq ranz. Dou youq ndaw camhhojceh Gvangjdungh doxgot daejnga’nga, daxboh daej lumj lwgnyez nei.

Lauxdoengz gangj sat, raemxda gou hix nyaenx mbouj ndaej doek roengzdaeuj.

Doeklaeng, miz ngoenz ndeu, daxboh gou caemh youq baih denva haenx daejnga’nga, de naeuz, lwg ha, duzmeuz ndaw ranz dai gvaq, gou banneix youh dwg bouxdog gag youq lo. Gou ganjnaeuz sim gou caemrwg mbouj doengh, hoeng baez dingq daengz sing daej daxboh, gou caemh daejnga’nga dingz mbouj ndaej.

Gou doiq daxboh naeuz, boh, gou seizneix cix ma ranz, boh, mwngz caj lwg.(2 sat)