Bonjbauq siusik（gicej Veiz Yingjcinh） 5 nyied 18 hauh dwg aen daih 49 “ngoenz bozvuzgvanj gozci”. Gvangjsih Minzcuz Bozvuzgvanj caeuq Gvangjsih Gohgi Cuzbanjse doxcaez youq Nanzningz guh Aen Hoih Fatbouh Sawmoq 《Damqra Vwnzva Bouxcuengh Lai Yiengh》. Cek saw neix dwg Gvangjsih Minzcuz Bozvuzgvanj caeuq Gvangjsih Gohgi Cuzbanjse doxgap doiok, dwg dauq saw “couqmaenh gij eiqsik Cunghvaz Minzcuz ranz vunz ndeu” ndawde cek ndeu, langhbaij gij yinxdaeuz vwnzva Bouxcuengh okdaeuj.

Cek saw neix aeu gij souyo dijbauj Gvangjsih Bozvuzgvanj guh lamzbonj, yungh daihneix dajveh dauqcungz lwnhgangj gij doxgaiq mizgven gijgwn、gijdaenj、gijyungh bouxminz Bouxcuengh caeuq gij lizsij vwnzva de, ndaej haenh baenz “aen bozvuzgvanj gwnz ceij”.

Daj fagfouj 80 fanh bi gonq vunz ciuhgonq Gvangjsih, daengz foujrin hung geizlaeng seizdaih hongdawz rin moq, daj gij dinfwngz dwkraemx cilungzgoet, daengz gij vwnzva gwn haeuxcid daihneix ciuqyiengh hwng, daj dinfwngz ndaem oij caeuq guh dangz, daengz ranzcanx ranzfaex daegbied, cek saw neix langhbaij bouxminz Bouxcuengh gaenx guh caeuq miz dungxcaiz liuxliux.

Linghvaih, cek saw neix lij lwnh gij ndangdaenj ciuhgeq Bouxcuengh “sam caengz laeuz”、aendom caeuq gij dinfwngz daemj Mancuengh doengh gij neix, saw doz caemh miz langhbaij vwnzva Bouxcuengh doxbau doxyungz, yienh’ok Cunghvaz Minzcuz doxyungz doxdoeng.