Mboengqneix, Nanzningz Haij- gvanh caeuq Swcigih Sanghvudingh lwnh vunzlai rox, bineix seiq ndwen gonq, Gvangjsih vaimou cincuzgouj 2584.1 ik maenz, doengzbeij lai hwnj 16.9%.

Bi 2025 guek raeuz cincuzgouj haidaeuz atlig hung. Nanzningz Haijgvanh mizgven boux fucwz nyinhnaeuz, miz baihrog hojnanz deuqnyex demlai, daengx gih gak mizgven bouhmonz caeuq gyoengq boux guenjguh vaimou dingj hoj baenaj、lai ra banhfap wngqdoiq, hawj seiq ndwen gonq Gvangjsih vaimou cincuzgouj guhbaenz gya soq hwnj ndei.

Bungz daengz baihrog hingzseiq fukcab yiemzhaenq, hawciengz hwngfat lai yiengh daegbied aeu haeujrwz. Bineix doxdaeuj, haujlai giyez Gvangjsih lailai haigvangq hawciengz lai yiengh, cingzcik yienhda. Soqgawq yienh’ok, seiq ndwen gonq, Gvangjsih doiq Dunghmungz cincuzgouj 1396.3 ik maenz, doengzbeij lai hwnj 16.3%, ciemq 54%, doiq Daigoz、Yinduniz- sihya doengzbeij faenbied lai hwnj 40.2%、95.5%. Caemhseiz, doiq Feihcouh、Cunghdungh、Ouhmungz faenbied cincuzgouj 169.5 ik maenz、131.9 ik maenz、81 ik maenz， doengzbeij faenbied lai hwnj 59%、7.1%、61.5%.

Daegbied aeu haeujrwz dwg, 4 nyied, Gvangjsih cingouj 333.6 ik maenz, doengzbeij lai hwnj 22.2%, daengx ndwen cingouj youh caiq hwnj sang. Ndawde huq gaiq hung cingouj 206.4 ik maenz, doengzbeij lai hwnj 27.9%. Ciengzsaeq daeuj yawj, sa doengzgvangq、yienzyouz cingouj ceiq yienh’da. 4 nyied, sa doengzgvangq cingouj 57.3 fanh dunh, doengzbeij lai hwnj 98.5%, dij cienz 103.2 ik maenz, ndawde song cingz baengh “baujsuiq gyaux gvangq” vunqsik cingouj. Caemhseiz, yienzyouz doxhaeuj 115.1 fanh dunh, doengzbeij lai hwnj 41.3%, soq cingouj dwg gyawj 25 ndwen neix ceiq sang, dij cienz 45.6 ik maenz, doengzbeij lai hwnj 29.1%.

(Denz Hihyaz Hij Danhdingz Vangz Yajmeiz)