Geij bi neix daeuj, Fungsanh Yen Bingzloz Yauzcuz Yangh aeu couq- maenh gij eiqsik Cunghvaz Minzcuz ranz vunz ndeu guh sienqmeh, cauhmoq aen vunqsik “dangjgen+”, aeu minzcuz doxgiet yungzhaeuj gizgiz yienghyiengh vwnzva swnjcienz、vunzlai guh yienghsaeh、guenjleix lajmbanj bae, mboujduenh doinyoengx gak minzcuz caezcaemh doxgiet buek- guh, caezcaemh mwnhoengh hwngfat.

Vatcimh gij swhyenz minzcuz vwnzva Lanzdenyauz, buedcienz 45.9 fanh maenz hwnqbaenz aen cungsim vueddoengh minzcuz vwnzva Lanzdenyauz Mbanjbahyez caeuq aen guenj minzsuz vwnzva, comz langhbaij dinfwngz guh buhvaq Lanzdenyauz、guh gij goenhsoij ngaenz、siulaeuj doengh gij neix. Cauhmoq hengzguh “feihyiz fwnz feiz dajveh”, dangjyenz bouxswnjcienz feihyiz doenggvaq “bohsae faek lwgsae” son dinfwngz bouxswnjcienz 40 lai boux, langhbaij feihyiz、cienz hag dinfwngz doengh gij yienghsaeh neix 40 lai ciengz, ndei daengz vunzlai 2000 lai vunzbaez. Yen cozgyah hezvei bae mbanj Lanzdenyauz Bahyez guh caijfungh, caijfungh cawjdaez dwg couqmaenh gij eiqsik Cunghvaz Minzcuz ranz vunz ndeu, caemhcaiq soengq 《Hoiz Yiengj》 cek saw ndaej Mauzdun Vwnzyoz Ciengj caeuq 《Minzcuz Vwnzyoz》 doengh gij saw neix hawj aen cungsim vueddoengh minzcuz vwnzva, doinyoengx hwnqguh aen suenranz cingsaenz caeuq minzcuz doxgiet baenaj caemhyamq.

Gaemdawz seizndei guh ciet, doenggvaq “dangjyenz daiqdaeuz、vunzlai caeuqfaenh” gij vunqsik neix, daengx bi guh yienjheiq、doiq fwen、biujyienj minzsuz vwnzva “dohgaiq” doengh gij yienghsaeh neix 12 ciengzbaez. Cauhmoq doiok langhbaij ndangdaenj minzcuz、ngaizdaizraez doengh gij hanghmoeg miz daegsaek neix, ciuyinx 5000 lai boux vunzlai caeuqfaenh. Hwnqbaenz fungh guhhong feihyiz 30 lai aen、dieg swnjcienz minzcuz vwnzva 3 aen, lailai gungganq daemj Mancuengh、guh buhvaq Lanzdenyauz doengh gij canjnieb miz daegsaek neix, aeu yiengh saehbaenz baujhoh vwnzva aeundaej cienjbaenz aen “canjnieb vuenyungz” hawj bouxminz lai miz ngaenz roengz daeh.

Cauhmoq “muengxgek saek- hoengz+yiengh romfaen” guenjleix vunqsik, aeu daengx yangh faen baenz 10 aen muengxgek hongsaeh minzcuz caemhcaiq boiq miz 80 boux dangjyenz bouxmuengxgek, bau benq fucwz. Caez youq 8 aen mbanj comzyouq minzcuz vunznoix doihengz “yiengh romfaen” guenjleix, aeu goeng’ik fugsaeh、diuzgaij doxndaq doxdawz doengh gij neix gvihaeuj daengx aen romfaen bae, vaqgej ndaej ndei ranznden doxdawz doxndaq 87 baez, baengh romfaen gij saeh iq neix bae guenjleix ndei lajmbanj, coihaeuj gak minzcuz lai doxcunz doxgyau doxyungz.(Vangz Yaulunz )