“Haj it”geizgan, Dunghhingh Goujan dwg cotsim youqgaenj hamj gyaiq lijyouz Cungguek caeuq Yeznanz, bouxhekyouz haeujok guek beij bingzciengz lai. Gaengawq Gvangjsih Haeujok Gyaiq Benhgenj Cungjcan fatbouh gij yawhgingj daezsingj yienh’ok, 5 nyied 1 hauh daengz 5 hauh, Dunghhingh Goujan yawhsuenq bouxhekyouz haeuj gyaiq yaek mauhgvaq 12.9 fanh vunz, moix ngoenz yaek miz 2.6 fanh vunz.

Vih wngqdoiq ndei mwh cuengqgyaj hek baedauq lai, Dunghhingh Benhgenjcan laebdin aen muzbyauh “hek huq song doeng”, gyoebhab saedhengz cwngcwz、 cingcinj okrengz. Fuengmienh ndeu baengh guenfueng veizsin gunghcunghau daezsingj hekyouz seizlawz vunz lai, dazyinx gyoengqde hableix anbaiz seizgan; lingh fuengmienh doenggvaq saedhengz dungdai ginzvu diuhdoh gihci, gohyoz faenboiq loh beijlaeh, youq mwh hek ceiq lai daeuj daengz gaxgonq baujcwng daengxcungq gingjcaz cienzbouh youq gangj、 loh cienzbouh hai, saedbauj bouxhekyouz doenggvan swnh. Youq fuzvu baujcang fuengmienh, ndalaeb daizfuzvu “dieg dazyinx + dieg cazcam + dieg bangfuz” sam gangj lienzdoengh, vih “laux nyieg bingh ndangcanz mizndang” daengj bouxhekyouz daegbied daezhawj daengx liuzcwngz fuzvu daj dazyinx caj genjcaz daengz bang doenggvan. Cimdoiq gij yihliuz aeuyungh gaenjgip, lienzdaemh doeng diuz loh gouqcoengh hamj gyaiq“1369 sengmingh ci cigdoeng”, cietsaed baujcang guh gij hong yihliuz gouqcoengh hamj gyaiq gaenjgip swnhleih yauliz sang.

Youq caenhrengz baujcang daehhek doenggvan doengzseiz, Dunghhingh Benhgenjcan doengzbouh doicaenh gaijndei swnggaep daehhuq doenggvan. Dunghhingh Goujan (ngeih giuz) daehhuq liuzliengh demmaj riengjvaiq, aen can neix itcig cungj lozsiz gij banhfap fuzvu “swnh doenggvan、 coi hailangh、 coengh hwngfat”. Giyez ndaej doenggvaq bingzdaiz gwnz muengx daezgyau gij saenqsik bwh’anq bouxhaici caeuq aen ci, riengjvaiq banhleix bwh’anq; vih gij huq sengsien、 gij doxgaiq wngqgip ndalaeb diuz loh cienyungh, saedhengz seizlawz daengz seizlawz genj、sien cuengq bae; mboujduenh gyagiengz gij doxgap boiqhab caeuq dangdieg cwngfuj、 haijgvanh、 ci daihleix gunghswh, engq gemjnoix gij seizgan huq doenggvan, daezsang doenggvan yauliz, baujhoh giyez hamj gyaiq gaicawx.

（Liengz Haijbinh/梁海彬）