Vunzcungnienz doiq song dah lwgnyez miz di yinxdaeuz, nienzgeij hauhneix iq couh rox gangj gij vah gig miz dauhleix haenx, cwngmingz songde yawj gvaq haujlai saw, gyadingz hix mbouj loek.

“Siujbaengzyoux，gvaqdaeuj gwn cenj caz ndeu.” Vunzcungnienz simhoengz heuh songde.

Song dah lwgnyez doq gvaqdaeuj, Vangz Meijyen ndwn dwk yawj vunzcungnienz goen raemx cawj caz. Vangz Meijyen cam:“Dou deq mbouj gib lo, siengj gwn raemx ndaw doengj ndaej mbouj？”

Vunzcungnienz gipmuengz aeu cenjsuliu ndingq raemx hawj gyoengqde naeuz:“Raemx gyoet bw.” Vangz Meijyen naeuz: “Mbouj youqgaenj.”

Vunzcungnienz song fwngz ndenq hawj Vangz Meijyen, youh song fwngz dawz cenj ndenq hawj Liuz Fanghfangh, Vangz Meijyen naeuz: “Dou gag dem raemx gwn.” Song dah lwgnyez lienzdaemh gwn roek cenj, vunzcungnienz yawj song dah lwgnyez hozhawq gvaqbouh lo, cam:“Haxbaenh sou mbouj daeuj gwn raemx?” Vangz Meijyen naeuz: “Siengj gwn ha, mbouj gamj cam.” Vangz Meijyen heuh daxmeh de daeuj gwn raemx, vunzcungnienz yawj gvaqbae, Vangz Meijyen naeuz: “Dwg daxmeh gou.” Vunzcungnienz doq heuh gvaqdaeuj naengh daengq naeuz:“Doiq mbouj hwnj, doiq mbouj hwnj.” Song fwngz ndenq cenj caz ndeu gvaqbae. Seiznit caz gyoet vaiq, vunzcungnienz hixnaengz oet caz haeuj cazcung bae, song fwngz cuengq youq gwnzdaiz baihnaj daxmeh Vangz Meijyen. Daxmeh Vangz Meijyen miz di launyaenq. Vunzcungnienz dwk denva cam baenzlawz baenzlai nanz mbouj dawz daeh hwnjdaeuj, Vangz Meijyen cam: “Boux vunzbiz neix dwg mehyah mwngz?”

Vunzcungnienz naeuz：“Dwg ha.” Vangz Meijyen riu naeuz：“Mwngz baenzneix byom, mehyah mwngz yienghhaenx biz?”

Daxmeh dop de naeuz: “Lwg fangzbyaiz neix mwngz, gangj vah mbouj roxsoq.” Cienj naj doiq vunzcungnienz boizlaex, “lauxbanj, doiq mbouj gvaq, dou saetlaex lo.”

Vunzcungnienz riugoekgoek naeuz:“Mbouj youqgaenj.” Youh dwk denva cam naeuz:“Dahli youq lawz, dawz ngeihcib aen daeh hwnj hajlaeuz daeuj cang saw, heuh Dahyen hwnjdaeuj dem!”

（27）