Seizgonq daenj buhvaq,

Sik gvaq liux caiq fong;

Baez yaek bae guhhong，

Vuenh buhfong bae doengh.

Seizneix buhvaq ndei,

Gvaqseiz liux cix vit(vut);

Geu de caiq mbouj sik,

Hix vit haeuj henz bae.

Seiz gaxgonq caen hoj,

Donqnoh hix mbouj miz;

Yaek gwn donq byaek ndi(ndei),

Caj bi bae daengz haemh.

Banneix ndwenngoenz moq,

Miz noh caiq miz bya;

Miz laeuj caiq miz caz,

Naemj gwn maz cungj ndaej.

Gaxgonq youq ranzhaz，

Gvaq laj hix dwglau,

Ngoenz fwn moenqfaufau,

Ndaw ranz lumj dauj raemx.

Seiz guekgya fouqmiz，

Gizgiz hwnj ranzlaeuz;

Raemx mbouj dumz mbouj laeuh，

Raeuz youq onj cwxcaih.

Ngoenzgonq daengz seizhah,

Aeu gyapgya vad rumz;

Yied vad hanh yied dumz,

Ndang cumx swz raemx rwed.

Banneix yungh funghsan,

Youh an miz gunghdiuz;

Seizhwngq mbouj gaenjyiuq,

Raeuz ciuq gwn ciuq guh.

Seizneix cwngcwz ndi(ndei),

Gizgiz cungj bienq moq;

Mbanjmbanj doeng goengloh,

Hohhoh cungj fatcaiz.

Seizneix gwndaenj ndei,

Ranzranz meiz(miz) siujceh;

Daengx bouxiq bouxgeq，

Naengh siujceh baeyouz.