5 nyied 1 hauh, Cungguek Dunghhingh Si——Yeznanz Mangz- gaih Si gapguh doihndei hawsingz cib hopbi nem 2025 gaiq nduj Cungguek Yeznanz gwih danci hozdung youq Dunghhingh Si banh. 240 lai boux danci yindungyenz caeuq boux gyaez gwih danci doxcaez yiengjsouh gij yinxdaeuz hamj guek gwih danci, angjhai dujva cingzngeih Cungguek Yeznanz.

Riengz sing bauq roengzlingh yiengj, gyoengq boux gwih danci daj Dunghhingh Si Cuzsanh Sanhhaij Doxlienz Deihbiu Gvangjcangz haidin, daengx raez daihgaiq 24 goengleix, dieg doekbyai dwg Yeznanz Mangzgaih Si Cazguj Gvangjcangz. Henz roen miz gyaiq dah gyaeundei、aenmbanj caemdingh huzndei、hawsingz hoenghhwdhwd. Gyoengq boux gwih danci mboujdan ndaej roxnyinh gij heiq ndwenngoenz andingh huzndei bien’gyaiq Cung- guek Yeznanz, youh ndaej roxnyinh gij yienghsiengq cingsaenz song dieg doxgiet haenqguh baenaj. Cungguek Dunghhingh Si caeuq Yeznanz Mangzgaih Si dan gek diuz dah ndeu, deih doxgyawj、vunz doxndiep, dwg dieg baihnaj doxgyau doxndei, bouxminz song guek “caez gwn dah raemx ndeu, caez ganj aen haw ndeu”. 2025 nienz dwg Cungguek Yeznanz laebgyau 75 hopbi nem “bi Cungguek Yeznanz yinzvwnz doxgyau”, hix dwg Cungguek Dunghhingh Si——Yeznanz Mangzgaih Si gapguh doihndei hawsingz cib hopbi. Song dieg roengzsim comz guh gaiq saeh “bi Cungguek Yeznanz yinzvwnz doxgyau”, lai hawj song guek song dieg doxgyau caeuq gapguh vwnzdij, hawj bouxminz sim doxdoeng, bangrengz cauhlaeb aen minghyinh doxcaemh Cungguek Yeznanz miz canloz yiyi.

(Yen Cangzginh Youz Hinghvaz)